DILI, 06 Fevereiru 2025 (TATOLI) – Aviaun foun husi kompañia aérea Aero Dili ho modelu Airbus A319-100 sei semo dahuluk mai Timor-Leste iha meadu Marsu, informa Diretór-Ezekutivu Aero Dili, Lourenço de Oliveira.
Airbus A319-100 ho matrikula Four Whiskey – Alfa Alfa Oscar (4W-AAO) daudaun ne’e sei iha hela prosesu pinta ho bandeira Timor-Leste nian husi PT. Industri Pesawat Terbang Nurtanio (IPTN) Bandung-Indonézia.
“Tuir kalendáriu, Airbus A319 sei to’o Timor-Leste iha meadu Marsu tinan ne’e, tanba hetan ona sertifikadu rejistu husi Autoridade Aviasaun Sivíl Timor-Leste [AACTL, sigla portugés] iha Janeiru 2025”, Lourenço de Oliveira informa ba Tatoli iha Timor Plaza.
Nia esplika katak ho prezensa Airbus A319 ida-ne’e sei aumenta númeru aviaun Aero Dili ne’ebé halo aperasaun ho rota bá internasionál iha Timor-Leste.
Tuir site ofisiál husi Planespotters.net, Airbus A319 ne’ebé rejista hanesan 4W-AAO, nu’udar aviaun produsaun ida husi empreza Hamburgu (XFW) husi Alemaña, ne’ebé antes ne’e na’in husi Xina Easthern Airlines ho númeru rejistu B-6231 dezde Jullu 2006 no ikus mai transfere ba Aeroportu Internasionál Husein Sastranegara, Bandung, Indonézia iha loron 18 Janeiru tinan ne’e atu pinta.
Lourenço de Oliveira salienta katak mákina aviaun ne’e hanesan ho ida tuan, maibé ninia kapasidade tun uitoan tanba, tula paseiru entre 120.
Aero Dili iha antes ona aviaun seluk ho modelu Airbus A320, ne’ebé uluk opera husi Bangkok Airways no hetan ona konfigurasaun atu tula pasajeiru hamutuk 162.
Aviaun ida-ne’e to’o iha Dili iha loron 20 fulan-Marsu tinan 2023. Ninia prezensa halo istória nu’udar aviaun komersiál dahuluk ho bandeira Timor-Leste nian.
Iha loron 12 fulan-Maiu 2023, Aero Dili nia Airbus A320 hahú halo nia vou internasionál sira ne’ebé ajenda ona dahuluk, entre Dili – Denpasar/Bali, Indonézia. Iha Fevereiru 2024, aviaun ida-ne’e lansa mós nia rota internasionál entre Dili – Singapura.
Notísia relevante: Aero Dili sei espande rota foun, Dili-Xina hahú iha Fevereiru
Jornalista: Arminda Fonseca
Editora: Maria Auxiliadora
