DILI, 06 Fevereiru 2025 (TATOLI) – Primeiru-Ministru, Xanana Gusmão, asina plaka iha Akademia Múzika Dom Alberto Ricardo da Silva, ne’ebé lokaliza iha Fatumeta, Dili.
Iha serimónia asinatura plaka ne’e, xefe Governu husu estudante sira aproveita oportunidade ho di’ak, nune’e liuhusi talentu múzika ne’ebé iha bele lori Timor-Leste nia naran ba mundu.
“Parabéns ba imi hotu, aproveita ho di’ak, nune’e imi bele iha kapasidade halo múzika sira ne’ebé furak no kualidade maske ita foin hahú ho difísil, maibé imi aproveita ho di’ak mak sei lori imi-nia talentu múzika ne’e hatudu ba mundu, katak imi mós bele duni. Ida-ne’e mak ita hotu nia esperansa”, Xanana Gusmão hateten iha serimónia asinatura plaka iha Eskola Akademia Múzika Fatumeta, Dili, ohin.
Iha biban ne’e, nia agradese ba profesór sira ne’ebé halo ona esforsu boot hodi harii eskola Akademia Múzika ida-ne’e.
Iha fatin hanesan, Diretór Akademia Múzika Dom Alberto Ricardo, Pe. Domingos da Costa, hateten prezensa xefe Ezekutivu ne’e importante tanba eskola ne’e eziste ho fundu husi primeiru-ministru, liuhusi Gabinete Apoiu Sosiedade Sivíl.
Saserdote ne’e haktuir katak eskola múzika ne’e rasik harii husi inisiativa Primeiru-Ministru Xanana Gusmão, Dom Alberto Ricardo (Matebian) no Maestro Simão Barreto, dezde 2002. “Sira na’in-tolu tau ideia hodi loke eskola múzika, sira-nia promesa ne’e konsege duni realiza iha momentu ida-ne’e. Ho ida-ne’e mak ohin konvida primeiru-ministru mai asina fali plaka ne’e”, dehan.
Ezisténsia Akademia Múzika hanorin joven sira hatene halo kompozisaun múzika
Pe. Domingos da Costa konsidera katak ezisténsia Akademia Múzika ne’e importante, tanba hanorin joven sira atu hatene halo kompozisaun múzika, hatene letra ba múzika no seluk tan.
Orsamentu ne’ebé primeiru-ministru apoia hamutuk millaun $1,7 hodi harii eskola ne’e, ne’ebé konstrusaun rasik realiza durante tinan-hitu nia laran, tanba hasoru obstákulu oioin hanesan pandemia covid-19, mudansa governasaun no seluk tan.
Akademia ne’e inaugura ona iha loron 06 Dezembru 2024 no daudaun hahú loke matríkula ba públiku no la limita ba idade.
“Hakarak fó hatene ba timoroan hotu katak Timór iha ona Akademia Múzika lokaliza iha Fatumeta,Dili, ne’ebé sé de’it hakarak atu apreende múzika bázika, instrumentu sira oioin bele aprende iha eskola ne’e”, nia aviza.
Kritériu atu rejista iha eskola ne’e mak hanesan presiza dokumentu diploma pré-sekundáriu, sekundáriu, inklui sertidaun batizmu. Eskola ne’e rejistu ho osan $10 no kada fulan selu $30 no durante tinan tolu eskola ramata, estudante sira sei hetan sertifikadu.
Estudante ne’ebé atu bá eskola iha Akademia Múzika ne’e, ba labarik sira mínimu tenke ramata ona eskola primária no ba ema boot la haree idade hahú husi joven to’o fetik-katuas.
“Daudaun, estudante ne’ebé rejistu ona hamutuk 60-resin. Rejistrasaun hahú loke iha Janeiru, sei taka iha semana ne’e, nune’e ba oin eskola hahú la’o dixilina ne’ebé sira sei apreende ne’e kona-ba múzika toka violiñu, piano, flauta no instrumentu seluk tan”, adianta.
Eskola ne’e iha manlorin hamutuk na’in-17, ne’ebé mak formadu husi Filipina, Indonézia no Austrália.
Iha sorin seluk, profesora Migalinda Maria hateten difikuldade ne’ebé sira hasoru mak estudante sira ne’ebé tama, balun seidauk iha koñesimentu kona-ba múzika. “Entaun, mai mak foin hanorin hahú husi báziku, maibé tempu la’o sira mós kapta lalais matéria ne’ebé hanorin no sira kompreende lalais”, realsa.
Notísia relevante: Eskola Akademia Múzika Don Alberto Ricardo iha Fatumeta hahú loke ba públiku
Jornalista: Arminda Fonseca
Editora: Maria Auxiliadora
