DILI, 06 janeiru 2025 (TATOLI)—Diretór Eskola Akademia Múzika Don Alberto Ricardo Timor-Leste, Padre Domingos Alves da Costa akompaña husi Koordenadór Padre Nelson da Costa Freitas, hasoru malu ho Primeiru-Ministru (PM), Kay Rala Xanana Gusmão, hodi hato’o agradesimentu tanba fó ona apoia finanseira hodi harii eskola múzika ida iha Timor-Leste.
“Ohin ami mai hasoru Primeiru-Ministru hodi agradese tanba agora ita iha ona eskola akademia múzika ne’ebé hetan ajuda finanseiru husi Primeiru-Ministru hodi loke eskola múzika ka akademia múzika Don Alberto Ricardo da Silva iha Timor-Leste, ne’ebé hahú loke ona ba públiku bele apreende kona-ba múzika,” Padre Domingos Alves da Costa, informa hafoin enkontru ho Xefe Governu, iha Palásiu Governu, segunda ne’e.
Notísia relevante : ME distribui ekipamentu muzikál ba estudante ESJ 12 Novembru iha Becora
Amu Padre Domingos Alves haktuir, eskola múzika ne’e rasik harii husi inisiativa Primeiru-Ministru Xanana, Monseñor Alberto Ricardo (matebian) no Maestro Simão Barreto, desde tinan 2002.
“Sira na’in-tolu tau ideia hodi loke eskola múzika, sira-nia promesa ne’e konsege duni realiza iha momentu ida-ne’e. Nune’e, ohin fó hanoin mós ba Primeiru-Ministru katak daudaun iha eskola no ekipamentu preparadu ona maibé saida tan mak Primeiru-Ministru hakarak implementa iha eskola refere hein nia prezensa,” nia akresenta.
Nune’e, Primeiru-Ministru husu atu kompleta liután fasilidade sira ne’ebé iha tanba bainhira estudante barak instrumentu maka la to’o mós ladún di’ak.
“Tanba ne’e maka husu Governu nia apoia atu kompleta, ne’ebé Primeiru-Ministru aseita sei kompleta instrumentu sira,” nia tenik.
Padre Domingos konsidera, ezisténsia eskola akademia múzika ne’e importante tanba hanorin joven sira atu hatene hakerek múzika, halo kompozisaun múzika, hatene letra ba múzika, no seluk tan.
Gabinete PM apoia orsamentu hamutuk millaun $1,685 hodi harii eskola, ne’ebé konstrusaun rasik realiza durante tinan-hitu nia laran tanba hasoru obstákulu oin-oin hanesan pandemia COVID-19, mudansa Governu no seluk tan.
Maski nune’e, konstrusaun finaliza ona no inaugura ona iha loron 06 dezembru 2024, daudaun hahú loke matríkula ba públiku no la limita ba idade.
Hafoin inaugurasaun daudaun iha ona aplikante 60-resin tau naran hodi apreende muzika hanesan toka violiñu, piano, flauta no instrumentu seluk tan.
“Hakarak fó hatene ba timoroan hotu katak Timor iha ona akademia múzika lokaliza iha Fatumeta Dili, ne’ebé sé de’it hakarak atu apreende múzika bázika, instrumentu sira oin-oin bele apreende iha eskola ne’e,” nia konvida.
Kritériu atu rejistu iha eskola ne’e mak hanesan presiza dokumentu diploma pré-sekunáriu, sekundáriu, inklui sertidaun batizmu. Eskola ne’e rejistu ho osan $10 no kada fulan selu $30.
Eskola ne’e iha profesór hamutuk na’in-20, ne’ebé hanesan formadu husi Austrália, Filipina no Indonézia.
Jornalista : Arminda Fonseca
Editora : Julia Chatarina