VIQUEQUE, 06 fevereiru 2025 (TATOLI)—Reprezentante Sekretáriu Estadu Kooperativa (SECoop, sigla portugés), Gil Bento, enkoraja komunidade husi suku Uma Uain Kraik, postu Viqueque Vila, munisípiu Viqueque envolve aan iha Kooperativa Kréditu Tane Malu (CCTM, sigla portugés) sai baze ekonomia ba povu kiik nian.
“Ohin ami mai iha organizasaun Kooperativa CCTM ne’ebé eziste iha suku Uma Uain Kraik, nune’e ha’u husu ba komunidade ne’ebé seidauk envolve aan iha Kooperativa ida-ne’e karik envolve aan ba oinsá imi tau forsa hamutuk, ita labele haree husi dook de’it. Maibé, hakbesik aan ba malu hodi envolve iha Kooperativa. Atu Governu fasil hodi fasilita no akompaña tanba kooperativa sai hanesan baze ekonómia povu nian, la’ós ema ho kapitál finanseiru boot nian,” Gil Bento hateten ba jornalista sira, iha assembleia CCTM dahuluk, iha aldeia Nahaeboruk, kinta ne’e.
Tan ne’e, nia dehan, kooperativa sai importante ba komunidade ne’ebé hela iha área rurál hamutuk hodi espresa hanoin hodi hadi’a ekonomia ba moris di’ak.
“Tan ne’e, ha’u husu dala ida tan ba ha’u-nia inan-aman no joven envolve aan ba kooperativa hodi hasa’e finanseiru. Ha’u husu komunidade labele define organizasaun kooperativa ne’e ba buat seluk,” nia dehan.
Kooperativa ne’e nu’udár organizasaun komunitária ba povu sira-ne’ebé hela iha baze, se komunidade seidauk kompreende lala’ok kooperativa bele konsulta ba funsionáriu SECoop ne’ebé destaka iha Viqueque.
Iha fatin hanesan, Prezidente CCTM, Jelaurina Nunes Fernandes, haktuir CCTM hahú eziste iha tinan 2021 to’o agora ne’ebé halo atividade kooperativa osan, prodús mina-nuu no rebusadu ai-lia.
“Ha’u iha kompromisu hakarak kompromete katak sei hadi’a ezisténsia CCTM nia esforsu hodi hasa’e kapitál kooperativa nian. Durante ne’e ami enfrenta liu ba mina nuu, transporte ba distribuisaun produtu ba nasionál,” nia hateten.
Difikukdade seluk, nia dehan, jestór ba rai no empresta osan no teizureira la dumina kona-ba utilizasaun ekipamentu komputadór, nune’e sai difikuldade ba CCTM presiza kapasitasaun ba sira hodi sira bele komprende.
Tuir dadus, CCTM totál hamutuk na’in-43 ne’ebé kompostu husi feto 30 no mane 13, hahú eziste iha tinan 2021-2024 ho totál kapitál hamutuk $18,000.00.
Partisipante ne’ebé partisipa iha asembleia CCTM dahuluk ne’e mak funsionáriu SECoop, organizasaun ADRA, autoridade lokál no membru CCTM sira.
Jornalista : Vitorino Lopes da Costa
Editór : Cancio Ximenes
