OEKUSI, 07 Fevereiru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) aloka orsamentu $53,799 hodi halo limpeza iha edifísiu sub-rejiaun haat inklui edifísiu Sekretáriu Rejionál ba Asuntu Administrasaun nian.
“Horsehik, konkursu públiku fó sai ona husi parte aprovizionamentu, kona-ba seguransa ba suku 18, ohin ita haree públika tan kona-ba limpeza mak manán na’in kompañia Penseka Unipesoál Lda,ida, atu halo limpeza ba iha Sekretáriu Administrasaun no edifisíu postu administrativu haat, Oésilo, Pássabe, Nítibe no Pante Makasar,” Sekretáriu Rejionál Administrasaun, Andre Lao, ba Ajénsia Tatoli iha Oekusi, ohin.
Iha edifisíu Sekretáriu Rejionál Administrasaun, sei rekruta ema na’in-ulau, no kada edifisíu sub-rejiaun sira, sei rekruta ema na’in-haat, ne’ebé ba asuntu limpeza sei presiza ema na’in-24.
Jestór sub-rejiaun Pássabe, Paulino Marques, agradese tanba husi Janeiru to’o Fevereiru edifisíu sira seidauk iha pesoál atu halo limpeza tantu edifisíu laran no li’ur.
“Agora tempu udan, duut mós nakonu, entaun presiza pesoál limpeza tanba kuandu iha edifisíu tenke iha ema ruma atu hamoos. Maibé ita agradese tanba ami rona konkursu públika ona, entaun presiza aselera, nune’e tempu badak bele halo ona rekrutamentu,” nia dehan.
Notísia relevante:Autoridade RAEOA planu destaka pesoál seguransa iha sede suku 18
Jornalista: Abílio Elo Nini
Editor: Florencio Miranda Ximenes
