OEKUSI, 06 Fevereiru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) aloka ona $57,480.00 husi Orsamentu Jerál Estadu (OJE) 2025, hodi rekruta pesoál seguransa 36 atu destaka ba sede suku 18.
Objetivu husi programa ne’e atu fó seguransa ba edifísiu suku sira, tanba iha sede suku balun laiha morru protesaun, nune’e presiza duni seguransa atu haree kondisaun no asegura ambiénte sede suku nian relasaun ho animál labele estraga.
“Programa ne’e foin dahuluk kria iha Oekusi, nia prosesu konkursu públikadu ona husi aprovizionamentu, agora kompañia vensedór hahú halo ona koordenasaun ho ekipa Sekretáriu Rejionál Administrasaun atubele halo rekrutamentu ba pesoál seguransa iha sede suku 18, kada sede suku pesoál seguransa na’in-rua, ne’ebé totál sei presiza ema 36,” hatete Sekretária Rejionál ba Asuntu Administrasaun, Andre Lao, iha Oekusi, ohin.
Kona-ba polítika ne’e, Xefe suku Costa, Francisco Colo, hato’o agradesimentu tanba sede suku nu’udar mós patrimóniu Estadu, no instala mós fasilidade Estadu, nune’e presiza pesoál seguransa atu asegura.
“Programa ne’e pozitivu tebes, tanba durante tinan barak ona, Governu seidauk destaka pesoál seguransa iha sede suku sira hodi asegura, tanba iha sede suku mós dokumentu importante sira iha inklui fasilidade Governu nian, iha mós atendimentu públiku ba komunidade nia nesesidade, entaun polítika di’ak no ami orgullu,” nia agradese.
Entretantu, kona-ba prestasaun servisu pesoál seguransa ba sede suku 18 ne’e sei ezekuta husi kompañia Falo Kaba Unipesoál Lda ho durasaun tempu tinan-ida.
Jornalista: Abílio Elo Nini
Editór: Florencio Miranda Ximenes
