Moras tolu sei kontinua rejista aas iha sentru saúde Kiumaonteko Oekusi
OEKUSI, 19 Agostu 2026 (TATOLI) – Durante fulan hitu, husi Janeiru to’o Jullu 2026 ne’e, moras tolu sei kontinua rejista aas iha Sentru Saúde Kiumaonteko, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
“Moras rejista aas iha Sentru Saúde Kiumaonteko iha tolu mak sei kontinua aas, primeiru ISPA, diárea no moras kulit,” Xefe Sentru Saúde Kiumaonteko, Anita da Cunha, ba jornalista sira iha Oekusi, ohin.
Kazu Infesaun Vias Respiratória Aguda (ISPA) rejista ho totál 10.722, komposta husi trimestre dahuluk atende pasiente 1.520, trimestre daruak 1.230, no trimestre datoluk foin to’o fulan-Jullu 491.
“Kauza husi moras ISPA, haree ba daudaun tempu bailoron, hamosu rai-rahun, liga projetu alargamentu estrada sira sei iha faze konstrusaun nune’e afeta tebes komunidade sira bele moras. Tanba ne’e, nia prevensaun tenke fase liman ho sabaun, uza máskra no konsumu ai-han ne’ebé nutritivu,” nia klarifika.
Notísia relevante:Diarea hamate labarik na’in sia
Kazu daruak maka moras diárea ho totál 470, rejista husi trimestre dahuluk 306, trimestre daruak 106, no trimestre datoluk rejista to’o fulan-Jullu 58. Fatór risku ba moras ne’e mai husi hahán ka bee ne’ebé kontaminadu ho rai-rahun no lalar iha tempu bailoron. Atu prevene, komunidade sira tenke hemu bee ne’ebé nono tasak tiha ona no kuidadu ijiéne hahán nian.
Kazu datoluk maka moras kulit ho totál 255, ne’ebé rejista husi trimestre dahuluk 129, trimestre daruak 94, no trimestre datoluk to’o fulan-Jullu rejista ona 22.
“Moras kulit ne’e mosu ho tipu oioin, maibé nia tratamentu durante ne’e refere liu ba médiku sira ho nia kauza mai husi ijiéne pesoál, ne’ebé kazu tolu ne’e, afeta kuaze hanesan tantu ba labarik no adultu sira, maibé ita agradese tanba estoke ai-moruk, kona-ba moras sira-seluk, kontinua eziste maibé rejista ho númeru ki’ik,” Anita hateten.
Notísia relevante:ISPA no diarreia rejistadu maioria iha Sentru Saúde Kiomaonteko – Pante Makasar
Jornalista: Abílio Elo Nini
Editór: Rafael Ximenes de A. Belo
