MCI klarifika: Projetu sentru produsaun masin iha Oekusi ‘la’ós’ abandonadu

OEKUSI, 21 Agostu 2026 (TATOLI) – Diretór Jerál Ministériu Komérsiu no Indústria (MCI, sigla portugés), Jorge Ferreira, klarifika katak, projetu konstrusaun sentru produsaun masin, ne’ebé lokaliza iha área Maesmone aldeia Maquelab suku Taiboko sub-rejiaun Pante Makasar Rejiaun Administrativa Espesiál Oekusi Ambeno (RAEOA), la’ós abandonadu.

“Semana kotuk, ekipa husi PDHJ mai haree direitamente katak projetu ne’e abandonadu, mas tuir loloos la’ós abandonadu, maibé ita hotu hatene, konstrusaun ne’e ita finaliza iha fulan-Outubru 2025, depoizde finaliza, ita komesa kanaliza tasi-been tama mai, maibé depoizde fulan-Outubru udan komesa tuun, entaun ita lakonsege halo preparasaun ba kolleta iha tinan ne’e,” nia hateten ba Ajénsia TATOLI,I.P iha sentru produsaun Masin, iha Maesmone, ohin.

Aleinde ne’e mós, iha fulan-Maiu 2026 ne’e, ekipa husi MCI hala’o tan vizita ofisiál ba konstrusaun referida, katak, bainhira iklima, laiha udan, kontinua kedas ba preparasaun kolleta.

“Maibé iha fulan-Maiu to’o Juñu no Jullu mós udan sei kontinua, entun ekipa MCI hamutuk ho kontratór nafatin tau matan no observa mós ba iklima, nune’e kompañia hamutuk ho MCI, nafatin iha komitmentu atu finaliza projetu produsaun masin referida iha tinan 2026 ne’e,” nia hateten.

Notísia relevante:Projetu produsaun masin iha Pante Makasar kontinua abandonadu, PDHJ observa direta

Entaun, hateten, saida maka MCI sei bele halo tan, maka dadaun ne’e sei hein tan ona tékniku ida husi Indonézia, tanba durante nia maka tau matan hela ba geomemran, tanba foin lalaís ne’e, geomemran  sira afetadu husi naturál, anin sobu sai hotu, tan ne’e maka difikulta atu aselera lalaís prosesu ba kolleta masin ne’e rasik.

“Atu informa ba públiku katak, projetu ne’e la’ós abandonadu, maibé tanba iha difikuldade no impedimentu husi natureza ne’ebé iha, liliu iklima udan kontinua tuun, tanba ne’e nia prosesu adianta to’o ohin loron. Sei ida-ne’e, hanesan konstrusaun baibain karik, maske tempu udan mós ita bele la’o, maibé tanba liga masin, entaun ita nafatin haree de’it iklima,” nia hateten.

Nia informa, kona-ba projetu produsaun masin, tasi mak bo’otliu ka tuun liu mós labele, tanba haree ba ninia kader, entaun presiza nafatin halo, akompañamentu ba natureza ne’ebé iha.

Notísia relevante:Ema deskoñesidu estraga konstrusaun sentru produsaun Masin iha Oekusi

“Atu fó hanoin ba públiku katak, observasaun husi PDHJ, reprezenta Ministériu MCI, nafatin apresia, ami la tau kestaun ne’e, maibé ami nafatin tau konsiderasaun katak, tenki fanun malu bebeik, tan ne’e ho sira nia observasaun, ami nafatin apresiza atu kontinua reforsa kontrolu sosiál liliu ba projetu sira implementa husi Governu tanba utiliza osan Estadu,” nia apresia.

Entretantu, sentru investimentu produsaun masin ne’e, Ministériu Komériu Indústria, prevee orsamentu hamutuk rihun $50-resin konstrusaun to’o prosesamentu kolleta

Notísia relevante:Asanami observa sentru produsaun Masin Oekusi no husu atu konsentra

Jornalista: Abílio Elo Nini

Editór: Rafael Ximenes de A. Belo

Edita, no hadi’a sai di’ak liután