DILI, 07 Fevereiru 2025 (TATOLI) – Embaixadora Filipina iha Timor-Leste, Mary Anne Padua, hasoru malu ho Primeiru-Ministru, Xanana Gusmão, iha Palásiu Governu. Iha enkontru ne’e, embaixadora afirma nia pozisaun atu apoia Timor-Leste nia adezaun ba Asosiasaun Nasaun Sudeste Aziátiku (ASEAN, sigla inglés).
“Ha’u ho Primeiru-Ministru diskute espesifikamente kona-ba Timor-Leste nia adezaun ba ASEAN. Antes ne’e, ha’u hetan destakamentu iha ami-nia eskritóriu ASEAN nian iha Manila dala-rua no iha ona esperiénsia balun iha ASEAN. Ha’u informa ba primeiru-ministru katak ha’u sei esforsu ho di’ak liu atu lori Filipina fó apoiu ba Timor-Leste”, Mary Anne hateten ohin.
Dilomata ne’e esplika katak hasoru malu ne’e mós aproveita hodi aprezenta aan ba xefe Governu nu’udár reprezentante Estadu Filipina nian iha Timor-Leste hodi garante serbisu hamutuk entre nasaun rua durante mandatu.
“Ha’u fó ha’u-nia garantia ba primeiru-ministru katak ha’u sei serbisu hamutuk ho Timor-Leste, hametin ita-nia relasaun bilaterál sira durante ha’u nia mandatu iha ne’e”, nia dehan.
Nia relata katak primeiru-ministru mós apresia no subliña atu hametin relasaun bilaterál entre país rua tanba Filipina mós envolve hodi fó apoiu ba Timor-Leste nia luta ba independénsia.
Embaixadora foun Filipina ba Timor-Leste, Anne Pádua, entrega ofisialmente karta kredensiál ba Prezidente Repúblika, José Ramos Horta, iha 30 Janeiru, hodi bele hala’o serbisu diplomata iha país.
Notísia relevante: Embaixadora Filipina entrega karta kredensiál ba PR Horta
Jornalista: Arminda Fonseca
Editora: Maria Auxiliadora
