DILI, 30 janeiru 2025 (TATOLI)—Embaixadora Filipina ba Timor-Leste, Anne Pádua, kinta ne’e, ofisialmente entrega karta kredensiál ba Prezidente Repúblika (PR), José Ramos Horta, hodi bele hala’o servisu diplomata iha Timor-Leste.
Notísia Relevante: Filipina komprometidu apoia Timor-Leste iha dezenvolvimentu rekursu umanu
“Ohin, Embaixadora foun Filipina nian mai entrega karta kredensiál ba Prezidente Repúblika atu komesa nia servisu hahú ohin to’o tinan tolu,” Vise-Ministra Asuntu ASEAN, Milena Rangel, hateten ba jornalista sira hafoin ramata serimónia entrega kredensiál iha Palásiu Prezidensiál Nicolau Lobato, Bairru Pite.
Hafoin termina entrega kredensiál, Embaixadora ne’e hala’o kedan enkontru bilaterál ho Xefe Estadu hodi ko’alia kona-ba kooperasaun bilateral entre nasaun rua ne’e.
“Enkontru bilarerál ne’e, ko’alia liu kona-ba akordu kooperasaun sira-ne’ebé antes ne’e ita halo ona iha área edukasaun no saúde, tanba ita-nia estudante lubuk ida mak agora estuda hela iha Filipina iha área rua refere, Nune’e mós ita ko’alia mós kona-ba ita nia adezaun ba ASEAN iha tinan ida-ne’e, Filipina fó sira-nia apoiu tomak mai ita-nia adezaun ne’e,” nia dehan.
Du’urante enkontru, parte rua mós ko’alia kona-ba tékniku kooperasaun ne’ebé estabelese tinan hira ba kotuk, no agora atu reativa fali oinsa atu haree fila-fali ba setór produtivu ne’ebé presiza dezenvolve hamutuk entre Timor-Leste ho Filipina.
Kooperasaun TL-Filipina
Antese e’e, Ministru Negosiu Estranjeiru no Kooperasaun Timor-Leste, Hernani Coelho, iha 17 dezembru 2015, hala’o enkontru bilateral ho Sekretáriu Negosiu Estranjeiru Filipina, Albert Del Rosario iha Filipila.
Enkontru ne’e, hanesan parte atividade ida husi vizita ofisial Ministru Hernani Coelho nian iha Filipina, hahú husi loron 16-19 dezembru 2015.
Sorumutu ne’e ko’alia kona-ba kooperasaun entre Timor-Leste ho Filipina iha área polítika, ekónomia, komérsiu, indústria, defeza, saúde, edukasaun, agrikultura, turizmu, imigrasaun, kursu tékniku vokasional ba área infarmajen no seluk tan. Diplomata rua ne’e mós partilla esperiénsia kombate no hamenus ki’ak nomos oinsá implementa Public-Private Partnership.
Atu hametin liutan kooperasaun iha futuru, parte rua konkorda atu iha tinan 2016, halo konsulta politika daruak iha Timor-Leste tanba konsulta politika dahuluk hala’o fulan Juñu 2014 iha Manila.
Durante enkontru, Governu Filipina kontinua reafirma sira-nia apoiu ba Timor-Leste nia adezaun ba ASEAN no husu mós Timor-Leste atu fó apoiu ba Filipina nia kandidatura iha organizasaun internasionál hanesan ICC, CEDAW, UNSC no IMO.
Hafoin enkontru ne’e, Ministru Hernani Coelho hamutuk ho delegasaun hasoru malu fali ho Diretór Jerál Insitutu Negosiu Estranjeiru Filipina, ko’alia kona-ba mekanizmu treinamentu ba diplomata Timor-Leste sira iha futuru.
Iha 16 dezembru 2015, Ministru Hernani Coelho hasoru malu mós ho Embaixadór sira husi nasaun ASEAN, CPLP, illa Pasifiku no grupu investór sira. Iha sorumutu ne’e, Ministru Hernani Coelho ko’alia kona-ba prosesu dezevolvimentu Timor-Leste durante tinan 13 no dezafiu sira.
Ministru Hernani hato’o agradesimentu ba nasaun membru ASEAN no CPLP ba sira-nia apoiu durante ne’e ba Timor-Leste nia adezaun ba ASEAN.
Iha vizita ofisial ne’e, Ministru Hernani Coelho akompaña husi Embaixador Timor-Leste ba Filipina, Juvencio Martins, Diretór Interinu ba Assuntu Sudeste Aziatiku, Pedro Laranjeira, Diretora Protokolu no Xefe Gabinete Interina, Elisa da Silva no Pontu Fokal, Ines da Luz.
Notísia Relevante: Filipina mantein pozisaun apoia adezaun TL ba ASEAN
Jornalista : Hortencio Sanchez
Editór : Cancio Ximenes
