DILI, 11 outubru 2022 (TATOLI)– Embaxadór Timor-Leste ba Filipina , José Gaspar dos Reis Piedade, informa pozisaun Governu Filipina mantein apoia Timor-Leste nia adezaun ba Asosiasaun Nasaun sira iha Sudeste Áziatika (ASEAN, sigla inglés).
“Filipina hanesan nasaun ida ne’ebé bele dehan iha mós pezu iha nasaun hotu iha ASEAN, nia nasaun ida ne’ebé forte tebes hodi apoiu adezaun Timor–Leste nian ba ASEAN”, dehan embaxaidór ne’e iha Farol Dili, tersa ne’e.
Notísia relevante:Sekjer ONU sei ko’alia ho nasaun G20 apoia TL adere ba ASEAN
Nia dehan, pozisaun Filipina nian hori uluk to’o agora nafatin firme, konsistente no la muda pozisaun hakarak mak Timor-Leste tenke adere ba ASEAN iha tempu besik.
Timor -Leste nia pozisaun atu tama ba ASEAN hodi sai hanesan membru loloos sei deside iha tinan oin tanba rekezitu hotu Timor–Leste priense ona.
Ekipa Fact Finding Mission hosi sekretariadu ASEAN nian halo ona avaliasaun ba pilar defeza seguransa, Ekonomia no sosiu kultural Timor – Leste nian ne’ebé remata ona iha fulan hirak liu-ba.
Tanba ne’e, tuir kriteria ASEAN nian nasaun membru 10 sei tur hamutuk halo reuniaun boot foin mak deside ho konsensu tama ou la tama depende nasaun ida-idak.
Timor-Leste hato’o pedidu adezaun ba ASEAN hahú hosi tinan 2011 maibé to’o ohin loron seidauk konsege adere ba asosiasaun.
MNEK kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun.
Aleinde ne’e, halo mós elaborasaun dokumentu Rejime Komérsiu Externu no enkuadramentu legál sira.
ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.
Maske, Timor-Leste daudaun ne’e seidauk adere ba ASEAN, maibé partisipa ona eventu balun ho nasaun membru sira.
Notísia relevante:Timor-Leste sai membru ASEAN ofisialmente iha tinan 2023
Jornalista: Hortencio Sanchez
Editór : Florencio Miranda Ximenes
