iklan

INTERNASIONÁL, DILI, HEADLINE, POLÍTIKA

Sekjer ONU sei ko’alia ho nasaun G20 apoia TL adere ba ASEAN

Sekjer ONU sei ko’alia ho nasaun G20 apoia TL adere ba ASEAN

Sekretáriu Jerál (Sekjer) Organizasaun Nasaun Unida (ONU), António Guterres, promete atu ko’alia ho líder mundiál sira, inklui líder nasaun membru G20 hodi apoiu adezaun Timor-Leste ba Association of Southeast Asian Nations (ASEAN). Imajen/Mundiál.

DILI, 27 setembru 2022 (TATOLI)—Sekretáriu Jerál (Sekjer) Organizasaun Nasaun Unida (ONU), António Guterres, promete atu ko’alia ho líder mundiál sira, inklui líder nasaun membru G20 hodi apoiu adezaun Timor-Leste ba Association of Southeast Asian Nations (ASEAN).

Notísia Relevante: Kambodia apoia Timor-Leste sai membru ASEAN iha 2023

Prezidente Repúblika, José Ramos Horta, agradese ba apoiu hotu hosi ONU no nasaun membru ASEAN sira-nia esforsu hodi simu Timor-Leste sai membru ASEAN ba dala-11.

Ba Xefe Estadu, António Guterres iha relasaun metin ho atuál Prezidente Indonézia, Joko Widodo, nune’e nia bele negosia hodi Timor-Leste adere lalais ba ASEAN.

 “Sekretáriu Jerál ONU, António Guterres, sempre prontu atu haree saida mak Timor-Leste presiza nia apoiu, bele dala ruma apoiu diretamentu hosi ONU maibé mós bele liuhosi ko’alia ho líder sira iha mundu, favór tau matan ba Timor-Leste. Nia (António Guterres) relasaun metin ho Prezidente Repúblika Indonézia, Joko Widodo, nu’udár mós Prezidente ba ASEAN no G20 iha tinan 2023. Ne’eduni, ita presiza buat ruma hosi Sekretáriu Jerál ko’alia ho líder Europeiu sira no G20, nia prontu atu halo loby ba Timor-Leste, nia sempre rai Timor-Leste iha nia ulun no fuan,”  PR Horta hateten liuhosi komunikadu imprensa ne’ebé Agéncia TATOLI asesu hosi mídia Palásiu Prezidensiál,  hafoin enkontru ho Sekjer ONU, António Guterres.

Xefe Estadu konsidera, Sekretáriu Jerál ONU, hanesan ema ida di’ak tebes, líder ne’ebé iha kualidade no koñesidu hanesan ema relijiozu nu’udár katóliku dezde hanesan Primeiru-Ministru Portugál, iha fuan di’ak tamba ne’e mak eleitu hanesan lideransa máximu ONU ho unanimidade tutuir malu.

Uluk iha tempu defísil 1999, hanesan Primeiru-Ministru Portugál, António Guterres halo presaun makaas ba Prezidente Amerikanu, Bill Clinton no líder Europeiu sira atu buka konsensu iha konsellu seguransa ONU, nune’e misaun forsa manutensaun ba dame INTERFET tama iha Timor-Leste.

Iha enkontru ne’e, Sekeretariu Jerál ONU apresia mós Xefe Estadu foun Timor-Leste ba períodu 2022-2027, José Ramos-Horta.

Durante estadia iha Amérika, Prezidente Repúblika hasoru malu ona ho Primeiru-Ministru Kambodia, Hun Sen, no líder mundiál sira saluk hodi ko’alia mos kona-ba prossesu Timor-Leste adere ba ASEAN.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!