DILI, 14 agostu 2023 (TATOLI)—Embaixadora Filipina iha Timor-Leste, Belinda Ante, hasoru malu ho Primeiru-Ministru (PM), Kay Rala Xanana Gusmão hodi afirma kompromisu Filipina apoia Timor-Leste.
“Ha’u ho Primeiru-Ministru halo diskusaun lubuk ida hodi implementa projetu balun liuhosi koordenasaun Governu Timor. Projetu ne’e iha área oin-oin hanesan dezenvolvimentu rekursu umanu,” Embaixadora hateten hafoin hasoru PM Xanana iha Palásiu Governu, segunda ne’e.
Notísia relevante : Filipina mantein pozisaun apoia adezaun TL ba ASEAN
Filipina komprometidu apoia Timor-Leste iha área agrikultura, tanba ne’e Embaixadora hato’o posibilidade investidór hosi Filipina investe iha Timor-Leste.
“Posibilidade investidór hosi ami-nia tama mai Timor-Leste. Sira ne’e mak agora iha hela prosesu, espera ami bele ajuda barak liután iha fulan balun tuir mai,” nia akresenta.
Embaixadora nota katak Governu atuál daudaun ne’e foku rezolve problema ekonomia rai-laran.
“Ha’u hanoin Governu daudaun esforsu maka’as tebes hodi rezolve problema sira ne’ebé mosu iha rai-laran. Realidade loos duni Primeiru-Ministru tenke konsentra hodi rezolve problema doméstika nasaun, tanba ida-ne’e bele apoiu ba integrasaun ekonomia ho ASEAN, Xanana rekoñese ida-ne’e, liu-liu iha rai-laran mak área ekonomia iha problema barak, dezafiu barak mak iha,” Embaixadora tenik.
Embaixadora rekoñese, maski ho mudansa klimátika ne’ebé difikulta dezenvolvimentu agrikultura, maibé Governu Timor-Leste iha hanoin di’ak hodi haree posibilidade sira atu apoia ninia nasaun no nia povu.
Jornalista : Antónia Gusmão
Editora : Julia Chatarina
