DILI, 07 fevereiru 2025 (TATOLI)—Koordenadór Jerál ba Jogu Komunidade Ko’alia Lian Portugés (CPLP, sigla portugés) no atuál Sekretáriu Estadu Arte no Kultura (SEAK), Jorge Soares Cristóvão, sesta ne’e, konvoka enkontru ho liña ministeriál relevante sira hodi ko’alia kona-ba preparasaun ba jogu CPLP.
“Ohin, enkontru ho liña ministeriál ne’ebé ita presiza fornese informasaun ba preparasaun vizita komisaun téknika ne’ebé sei mai husi Sekretariadu CPLP iha loron 23 fevereiru to’o 01 marsu,” Koordenadór Jerál informa ba Agência Tatoli, hafoin sorumutu iha salaun Ministériu Juventude, Desportu, Arte no Kultura (MJDAK), Bidau-Lecidere.
Delegasaun hamutuk 24 mak sei halo vizita hodi haree kondisaun no preparasaun sira, hanesan instalasaun sekretariadu, kondisaun kampu no otél.
Aleinde ne’e, sei iha mós fórum juventude no konferénsia ministériu juventude CPLP nian ne’ebé nasaun sira sei reprezenta sira-nia ministru rasik.
“Sira sei vizita ita-nia Sekretariadu, haree rekezitu balun kona-ba parte saúde, inklui dokumentu imigrasaun saida mak presiza kompleta iha momentu ne’ebá,” nia akresenta.
Notísia relevante : MJDAK-FTTL diskute preparasaun atleta ba jogu CPLP
Nune’e, Ekipa husi Ministériu Saúde (MS) no Ministériu Negósiu Estranjeiru no Kooperasaun (MNEK) halo koordenasaun protokolu ho Koordenadór Jerál.
“Parte Governu Indonézia atu haree delegasaun balun sei estadia iha Bali, ida-ne’e ita sei akompaña no fó asisténsia protokolu ba sira. Parte Ministériu Transpore Komunikasaun (MTK) atu fasilita atendimentu voo delegasaun sira,” Koordenadór Jerál relata.
Delegasaun husi Angola sei mai ho voo privadu no sei konvida país balun hanesan Guiné Ekuatoriál inklui país seluk tan atu mai hamutuk ho aviaun ida.
“Iha sorumutu ne’e ko’alia atu haree kondisaun ita-nia aeroportu hodi aviaun tun. Preprasaun inter-ministeriál la’o to’o eventu jogu ne’e halo abertura no enserramentu. Tanba ne’e hotu-hotu nia kontribuisaun di’ak tebes ba ita-nia atividade ne’e, atu simu delegasaun sira hotu no halo abertura ba ita-nia eventu ida-ne’e ho di’ak,” nia tenik.
Bazeia ba rezolusaun husi Konsellu Ministru, iha ministériu 12 inklui Sekretaria Estadu Komunikasaun Sosiál (SEKOMS) mak envolve ba kontribuisaun atu fornese informasaun tuir serbisu ne’ebé sira iha ba Sekretariadu atu halo serbisu ba preparasaun.
Jogu CPLP tinan ne’e sei hetan partisipasaun másimu husi Estadu membru sira, ho delegasaun hanesan Angola ho partisipante 101, Brazíl 101, Cabo-Verde 101, Guiné-Bissau 61, Guiné Ekuatoriál 35, Mosambike 70, Portugal 101, São Tomé e Princípe 35 no Timor-Leste 101.
Eventu importante ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Jornalista : Nelson de Sousa
Editora : Julia Chatarina
