BOBONARO, 07 fevereiru 2025 (TATOLI)—Xefe suku Oe-leu, postu administrativu Bobonaro, munisípiu Bobonaro, Januario Meta Tae Bragança ‘Buka-Maluk’, preokupa ho implementasaun projetu konstrusaun eskola sala tolu iha Ensinu Bazíku Filiál (EBF) Dom Mauloe ne’ebé paradu dezde dezembru 2024 to’o ágora tama fevereiru 2025 ona mós seidauk kontinua.
Obra ne’e hahú implementa iha novembru tinan 2024 liu ho orsamentu Programa Nasionál Dezenvolvimentu Suku (PNDS) siklu VI no daudaun ne’e progresu fiziku atinje ona 55%.
Notísia Relevante: Orsamentu 2025 ba PNDS Bobonaro labele kobre hotu suku 50
“Ita bele dehan kuaze loke kuotasaun ne’e foin fulan ida, hala’o servisu ne’e fulan ida-resin, maibé paradu hela tanba problema iha orsamentu. Ami xefe suku ne’e preokupa loos obra ne’e foin tama 55% husi munisípiu dehan osan ne’e laiha tiha ona dada ona ba kofre Estadu,” Xefe suku Oe-leu, informa ba jornalista sira, iha Malilait, kinta ne’e.
Antigu estafeta FALINTIL fronteira súl ne’e konfirma, progresu fiziku obra ne’e lae tarde uitoan, tanba kondisaun estrada difikulta fornesedór sira fornese materiál lokál no fabrikadu.
“Estrada liga husi Maliana sa’e mai to’o Colimau grave, liga ba matadalan PNDS ne’e rai-henek ita tenke raut iha Cailaco,” líder komunitária ne’e dehan.
Ba kestaun ne’e, Januario ‘Buka-Maluk’ rekomenda ba Governu liuliu Ministériu Administrasaun Estatál (MAE) atu buka solusaun hodi rezolve problema ne’e iha tempu badak, nune’e bele finaliza obra ne’e.
“Se bele orsamentu ne’e ita tenke ezekuta halo hotu, se ita uza la hotu servisu paradu hela ne’ebá ne’e oinsá ita atu dezenvolve suku. Ita haree, ha’u-nia suku ne’e iha sentru tan. Iha públiku nia matan, liu ba-mai ne’e preokupa ho konstrusaun sala tolu (3) ida-ne’e,” nia hateten.
Hatán ba preokupasaun ne’e, Sekretáriu Estádu Dezenvolvimentu Lokál, Mateus dos Santos Tallo, deklara politikamente Governu sei haree hodi foti dezisaun.
Governante ne’e rekoñese iha tinan 2024-2025 situasaun klima liuliu udan la fó biban atu halo mobilizasaun materiál konstrusaun ba projetu sira implementa iha suku Oe-leu no suku sira seluk liuliu iha postu administrativu Loloto’e tanba susar tebes transporte atu asesu.
“Ha’u hanoin ida-ne’e problema ida ke servisu PNDS ho nia ekipa tomak autoridade sira hasoru iha terrenu. Ha’u hanoin sei haree razaun oinsá politikamente ita bele finaliza tiha projetu ida-ne’e. Karik, iha tempu udan para finaliza tiha, ami sei esforsu buka dalan prosesu ne’e to’o ona dalan klaran, ita labele soe hela. Se ita so’e hela osan Estadu lakon leet de’it, ita-nia populasaun hein benifisíu husi projetu ida-ne’e,” sekretáriu ne’e dehan.
Enkuantu totál orsamentu ne’ebé gasta ba konstrusaun sala tolu (3) iha EBF Dom Mauloe ho valór rihun $38-resin ho durasaun servisu fulan tolu (3).
Notísia Relevante: Progresu reablitasaun sede suku Oe-leu atinje 45%
Jornalista : Sergio da Cruz
Editór : Cancio Ximenes
