BOBONARO, 06 dezembru 2024 (TATOLI) – Alokasaun Orsamentu Jerál Estadu 2025 ba Programa Nasionál Dezenvolvimentu Suku (PNDS) Munisípiu Bobonaro menus kompara ho tinan 2024, nune’e implementasaun projetu ba tinan oin labele kobre hotu suku 50.
Diretór PNDS Munisípiu Bobonaro, Rosário Mali, esplika, orsamentu tinan 2024 ne’e aloka ba PNDS Bobonaro hamutuk milaun $2-resin ($2,465,900) hodi finansia ba projetu iha suku 50, maibé tinan ne’e labele kobre suku hitu tanba hetan de’it orsamentu milaun $1-resin.
Notísia relevante: KFP nomeia Rosário Mali lidera PNDS Bobonaro
“Agora tinan oin ne’e governu aloka de’it millaun $1,449, sorti di’ak aloka tan osan rihun $300-resin husi programa merenda eskolár, maibé sei labele kobre, ita osan totál millaun $1,900-resin ne’ebé mak hetan aprovasaun, maibé fahe ba suku 50, entre suku 37 mak sei hetan hodi implementa programa PNDS, suku 13 la hetan tanba ne’e ha’u entrega ba autoridade atu deside suku ne’ebé mak atu hetan no suku ne’ebé mak la hetan, ka halo fazeadamente ka oinsá,” nia hateten asuntu ne’e iha sede suku Raifun, kinta ne’e.
Nia husu ba líder komunitária no komunidade atu koopera ho ekipa PNDS atu nune’e bele transforma suku 50 iha Bobonaro sai naroman.
“Mai ita hamutuk dezenvolve ita-nia munisípiu Bobonaro,” Diretór PNDS Munisípiu Bobonaro hakotu.
Biban ne’e, Sekretáriu Autoridade Munisípiu Bobonaro ba Asuntu Administrasaun no Finansa, Domingos da Costa, reforsa orsamentu operasionál iha programa PNDS hahú 2021 to’o 2024 hamutuk rihun $137 tenke fila ba kofre estadu tanba la konsege ezekuta.
Nia apela ba líder komunitária atu tuur hamutuk ho komunidade sira kontinua halo planu prioridade, tanba programa PNDS sei kontinua la’o.
“Neneik neneik, buat hotu ne’ebé ita mehi, ita sei halo,” nia katak.
Notísia relevante: PNDS finaliza ona projetu RSS 15 iha postu Bobonaro
Jornalista: Sérgio da Cruz
Editór: Evaristo Soares Martins
