BOBONARO, 26 outubru 2023 (TATOLI)-Komisaun Funsaun Públika (KFP) nomeia ona Rosario Mali dos Santos hodi asume kargu hanesan Diretór Programa Nasionál Dezenvolvimentu Suku (PNDS) munisípiu Bobonaro hodi troka Diretór sesante Paulino Viegas Tilman.
Nomeasaun ba kargu Diretór PNDS foun munisípiu Bobonaro ne’e baseia ba desijaun hosi CFP númeru 5790/2023 no depaisu hosi Ministru Administrasaun Estatál (MAE), Tomas do Rosário Cabrál ho númeru referénsia 136/M-MAE/X/2023.
Nune’e, iha kinta, loron 26 fulan-outubru 2023, realiza serimonia termu entrega kargu Diretór hosi Diretór sesante ba Diretór foun ne’ebé asiste diretamente hosi Prezidente Autóridade Munisípiu Bobonaro, Ernesto Oliveira Barreto.
Iha intervensaun, Prezidente Autóridade Munisípiu Bobonaro, Ernesto de Oliveira Barreto, agradese ba diretór sesante tanba fó ona dedikasaun boot hodi implementa ona servisu no programa PNDS nian durante tinan 10 ona. Maibé nia husu atu Diretór sesante kontinua kolabora hodi fó kontribuisaun ba dezenvolvimentu instituisaun nnian hodi fó moris diak ba povu.
“Ba Diretór foun husu atu kolabora no koordena ativa ho nia rasik no administradór postu sira nune’e bele alkansa metas ne’ebé define ona tuir matadalan PNDS nian,”nia hateten.
Notísia Relevante:Governu presiza rekruta urjénsia tékniku PNDS Bobonaro
“Ha’u husu ba funsionáriu PNDS sira hotu katak koor partidu rai hela iha portaun ne’ebá labele hodi tama mai atu nune’e ita lori Bobonaro ba oin entaun presiza ita hotu-hotu nia kontribuisaun ba diretór foun, servisu sólidu ema ida de’it,”Nia hateten iha salaun administrasaun munisipál Bobonaro.
Biban ne’e, Diretór sesante PNDS munisípiu Bobonaro, Paulino Viegas Tilman rekonese durante mandatu seidauk halo buat barak ba povu munisípiu Bobonaro, maibé konsege rezolve mós problema sosial seluk.
Durante mandatu, Diretór Sesante nian konsege implementa ona projetu hamutuk 1,922 hosi totál ne’e finaliza ona 1,120 no hela de’it 799 mak implementa hela hanesan uma naroman ba povu tinan 2022 no projetu RKRE II no bee-moos adisionál ne’ebé la’o atraza hela.
“Ha’u espera katak Diretór foun kontinua ba ho didi’ak no tau-matan nafatin ba ita-nia povu sira ho maneira serví hodi halakon pobreza iha Timor-Leste.
Iha fatin hanesan Diretór foun PDNS Munisípiu Bobonaro, Rosario Mali dos Santos ‘Atody’ rekoinese kna’ar ne’ebé nia simu la’ós oportunidade maibé hanesan responsablidade bo’ot ida ba nia hodi hatutan servisu ne’ebé diretór sesante hosik hela.
“Ha’u agradese ba Diretór sesante ne’ebé lidera ona ami durante tinan barak hodi hala’o programa PNDS ne’e ho susesu liuhosi ida ne’e ha’u aprende no hetan ona esperénsia natoon hosi diretór sesante, ida ne’e sai hanesan referensia ida ba ha’u atu nune’e hala’o servisu liu-liu programa PNDS hamutuk ho kolega,”Nia katak
Nia promote sei kolabora mós ho Prezidente Autoridade Munisípiu, Diretór sesante ho funsionáriu PNDS tomak hodi tau-matan ba projetu sira ne’ebé abandona hela hodi bele konklui iha fulan-dezembru tinan 2023.
Dadaun ne’e, PNDS munisípiu Bobonaro iha funsionáriu 32 kompostu hosi funsionáriu permanente 26, ajente ida no kazuál haat.
Notísia Relevante:PNDS Bobonaro menus rekursu umanu kontrola projetu
Jornalista: Sergio da Cruz
Editór: Agapito dos Santos
