VIKEKE, 07 fevereiru 2025 (TATOLI)—Prezidente Autoridade Munisípiu (PAM) Viqueque, Francisco Cruz Simões de Gonzaga Soares, hateten, ba foos folin ne’ebé dadaun sa’e $25 iha suku Laline, postu administrativu Lakluta sei komunika Sentru Lojistika Nasionál (CLN, sigla postugés) hodi halo intervensaun.
Notísia Relevante: Estrada ba suku Laline aat, folin foos saka ida sa’e $25
“Ha’u seidauk simu informasaun ruma kona foin foos husi administradór Lacluta no Servisu Diresaun Alimentár munisipál, maibé ha’u sei kominika diresaun kompetente hodi responde nomós Administradór Postu Administrativu (APA) Lakluta hodi relata ba ha’u,” Prezidente Autoridade munisípiu Viqueque ne’e hateten ba Agência Tatoli, iha nia kna’ar fatin, sesta ne’e.
Tanba ne’e, líder másimu munisípiu Viqueque ne’e hateten, durante situasaun presu foos la’o normál maibé agora presu foos iha suku Laline kilógrama 25 sa’e to’o $25.
“Loloos informasaun sira-ne’e Admionistradór Postu Administrativu (APA) sira tenke ko’alia hodi ita buka solusaun. Maibé, ho informasaun sira-ne’e ha’u sei kontaktu ba CLN hodi halo intervensaun foos ba postu Lakluta, hodi ita-nia komunidade sosá,” nia dehan.
Nune’e, nia lembra, foin lais tinan kotuk (2024) foos husi CLN mai halo intervensaun iha munisipiu Viqueque ba postu tolu inklui postu Lakluta hamutuk tonelada haat, maibé agora folin foos sa’e fila-fali tan presiza halo intervensaun.
Fó hanoin fali katak intervensaun Governu halo intervensaun foos iha munisípiu Vikeke ba postu Lakluta, Ossú no Vikeke Vila.
Iha intervensaun dahuluk iha agostu 2024 hamutuk tonelada 50, kada saku ida presu $12,50 ne’ebé distribui ba postu tolu.
Enkuantu, intervensaun daruak iha novembru 2025 hamutuk tonelada 40 ne’ebé aloka ba postu tolu mak hanesan postu Lakluta aloka saku 1.200, postu Vikeke Vila aloka 1.600 no postu Ossú aloka foof saka 1.200.
Entretantu, dadus populasaun suku Laline iha aldeia lima kompostu husi Aimeti-Hun, Fatu-Kedo, Mau-Ama, Mikradek no Santo Antonio, ho totál populasaun 943 (tuir sensu 2015).
Nune’e mós dadús populasaun husi suku Ahic kompostu husi aldeia lima (5) hanesan Crarec Boco ho total uma kain 42, Hali-oan ho totál uma kain 36, Ailooc iha uma-kain 57, Halimean iha 97, Cai-ua iha 72, nunee totál uma kain iha suku hamutuk 304 no totál populasaun 2.004.
Notísia relevante:
Jornalista: Vitorino Lopes da Costa
Editór : Cancio Ximens
