DILI, 07 fevereiru 2025 (TATOLI)—Provedor dos Direitos Humanos e Justiça (PDHJ), Virgílio da Silva Guterres husu ba Sekretaria Estadu Komunikasaun Sosiál (SECOMS-sigla portugés) atu promove lian jestuál iha Rádiu Televizaun Timor-Leste, Empreza Públika (RTTL,EP) no televizaun privada sira nune’e bele fasilita ema defisiénsia sira bele akompaña informasaun sira ho di’ak.
“Ha’u-nia rekomendasaun mak oinsá iha RTTL iha programa ne’ebé hanorin língua jestuál no ba iha braille nian ne’e karik bele tau minutu 10 ka 20 atu ema esplika katak A mak ida-ne’e no B mak ida-ne’e para ema bele akompaña,” Virgílio tenik iha nia intervensaun iha serimónia simulasaun ba teknolojia letra braille ne’ebé hala’o iha salaun Joao Paulo II Comoro, sesta ne’e.
Nia dehan, lian jestuál no braille ne’e la’ós ema ho ema defisiénsia nian problema, más ne’e Estadu nia obrigrasaun atu tau-matan ba ida-ne’e tanba konstituisaun mak garante.
Notísia relevante: AHDMTL halo simulasaun ba teknolojia letra Braille ba edukasaun inkluziva
Virgilio mós husu bá Ministériu Edukasaun atu tau letra braille no lian jestuál iha kurríkulu nasionál atu fasilita ema ho defisiénsia sira.
Provedór mós husu bá Komisaun Nasionál Eleisaun (CNE-sigla portugés) atu fó formasun ba defisiénsia matan sira liuliu ba letra braille atu fasilita maluk hirak-ne’e hodi ezerse sira-nia direitu votu iha eleisaun.
Iha fatin hanesan, Prezidente Asosiasaun Halibur Defisiénsia Matan Timor-Leste (AHDMTL, Gabriel de Sousa husu bá Sekretaria Estadu Komunikasaun Sosiál atu ajuda promove atividade AHDMTL.
Nia dehan, bá-oin hakarak koopera ho SECOMS para publika atividade Asosiasaun Halibur Defisiénsia Matan iha televizaun tantu iha rede sosiál (facebook).
Hatán ba kestaun ne’e, Sekretáriu Estadu Komunikasaun Sosiál, Expedito Loro Dias Ximenes hateten Governu prezensa iha atividade AHDMTL tanba sei suporta.
“Sekretaria Estadu Komunikasaun Sosiál sei husu ba RTTL hanesan mídia Estadu nian no mós sei husu televizaun privada GMN atubele oinsá loron-loron iha minutu ida ka rua fó hanesan spot publika kona-ba letra braille bá públiku,” nia promete.
Nia hatutan, durante ne’e SECOMS iha duni atividade ho asosiasaun ema ho ema defisiénsia sira liuliu RHTO prodús vídeo ba atividade sira no dezenvolvimentu nasionál no entrega ona bá RTTL no publikadu ona.
“Ha’u husu bá sira bele prodús entrega bá Rádiu Televizaun Timor-Leste atu publika sira-nia atividade,” nia konklui.
Jornalista: Natalino Costa
Editór: Xisto Freitas da Piedade
