DILI, 09 Fevereiru 2025 (TATOLI) – Boxista timoroan husi El-Matador Boxing Club ho naran istimadu, Deniel Assis Belo, susesu iha jogu Boxe HSS Bali hodi tuku monu nia adversáriu Sakti Manulag hosi Indonézia iha rin leten durante, iha ronde datoluk, domingu kalan ne’e iha Bali, Indonézia.
Tuir kritéria jogu entre Boxista Deniel ho nia adversáriu tenke joga to’o ronde da-haat, maibé ho forsa ne’ebé iha Deniel konsege hamonu Sakti iha ronde da-tolu.
Durante jogu la’o, Boxista na’in-rua lansa kontra no atake ba malu iha rin leten, maibé Deniel hatudu nia forsa ne’ebé brillante iha ronde datolu. Vitória ne’e fó ksolok tebes ba povu Timor-Leste.
Boxista husi klube El-Matador Boxe ne’e tenke loke liras, hafalun ho bandeira RDTL iha nia isin, akompaña husi nia treinadór Abilio Orlando dos Santos haksoit iha rin leten bainhira nia Boxita manán ho rezultadu KO.
Ho vitória ne’e, Sekretariu Jerál klube Boxe El-Matador, Zezito Silva, hateten Manu Aman Timor futu ona konsege hatun Aanu Aman hosi Indonézia.
“Ita-nia Manu aman Timor (Deniel), ohin ita futu ona, ita manán ho Knock out. Atleta timoroan ne’e siak, ita hamutuk ho Sira sai siak liutan,” Sekretariu Jerál ne’e hateten ba Agência TATOLI via media WhatsApp, domingu ne’e.
Nia dehan tan, “Aproveita meiu ida-ne’e, hakarak fó obrigadu ba povu Timor-Leste, Rai Lulik no matebian Sira hotu. Imi hotu nia tulun, ita sempre hamorin Timor ilha mundu, liu hosi Boxing”.
Nia hatutan, lá haluha agradese ba parte hotu ne’ebé apoia ba klube El-Matador partikularmente atleta na’in-rua. Ema hotu nia apoia mak Boxita sira sei forsa liutan.
Notisia relevante:Ohin, Boxista Delio-Deniel dezloka bá Indonézia
Jornalista: Hortencio Sanchez
Editór: Florencio Miranda Ximene
