DILI, 06 fevereiru 2025 (TATOLI)–Boxista na’in-rua husi klube El-Matadór, Delio Mouzinho no Deniel de Assis Belo, kinta ne’e, hamutuk ho ekipa dezloka ona bá Indonézia hodi kompete iha eventu HSS Bali ne’ebé sei realiza 09 fulan-fevereiru 2025.
Notísia Relevante: Boxista Delio Mouzinho-Daniel Belo sei kompete iha eventu HSS Bali
“Ohin, ita-nia boxista na’in-rua hamutuk ho ekipa sei arranka bá Indonézia hodi kompete iha eventu HSS iha Bali. Ita-nia boxista na’in-rua (2) preparadu ona. Ita ba ne’e, Delio sei hasoru Boxista husi Usbekistan no Deniel sei hasoru boxista husi Indonézia husi Ambon. Sira na’in-rua (2), boxista Delio sei joga iha ronde neen (6) no Deniel sei joga iha ronde haat (4),” Treinadór Prinsipál El-Matadór, Abilio Orlando dos Santos, hateten liuhusi konferénsia imprensa ne’ebé realiza iha Hotel Ventura, Lecidere.
Ho nune’e, nia dehan, ekipa El-Matadór ohin hasoru direta ho Primeiru-Ministru, Kay Rala Xanana Gusmão, hanesan serimónia despedida ida hodi husik boxista na’in-rua dezloka ba Indonézia.
“Ohin, ami mós ba hasoru ita-nia Primeiru-Ministru hanesan despedida, iha ne’ebá Primeiru-Ministru husu ami atu ba hala’o jogu ho di’ak. Ami la’ós ba pasear hanesan turista maibé ami ba lori Timor-Leste nia naran hodi kompete. Iha oportunidade ne’e ha’u hatan kedan ba Primeiru-Ministru ami sei lori rezultadu di’ak mai Timor-Leste,” nia dehan.
Nune’e mós, ekipa klube El-Matadór ba hasoru mós Ministru Juventude Desportu, Arte no Kultura (MJDAK), Nelyo Isaac Sarmento, antes sira aranka ba Bali-Indonézia.
“Ami mós ohin ba hasoru ona Ministru Nelyo hodi despede, iha ne’ebá Ministru husu ba boxista na’in-rua (2) atu ba hatudu jogu ho di’ak, dixpilina no Governu nafatin apoiu atividade saida de’it mak reprezenta Timor-Leste iha eventu internasionál sira,” Prezidente El-Matador ne’e tenik.
Iha okaziaun ne’e, estrutura El-Matador agradese ba patrosinadór hirak ne’ebé durante ne’e apoiu másimu ba El-Matador hodi ba kompete iha eventu ne’e.
“Iha ne’e ami agradese mós ba patrosinadór sira-ne’ebé durante ne’e fó ona apoiu mai ami. Patrosinadór sira mak hanesan ita nia Primeiru-Ministru rasik, Vise-Primeiru-Ministru maun Assanami, MJDAK, Caltech, Bee-Leste, Talho Moris, Rosario, Tahana, Ponkys, Maxxis, Timor Telecom, Borala Fuel no seluk tan. Sira ne’e mak apoiu ami makaas hodi ba kompete iha eventu ne’e, no la haluha mós Maun Raul Lemos mós apoiu ami makaas,” nia dehan.
Durante hela iha Bali, nia hatutan, Emprezariu timoroan Raul Lemos mak sei fasilita fatin hanesan Hotel no seluk tan durante estadia iha Bali.
“Ami mós antes ne’e ba hasoru Ministru Nino Pereira, iha ne’ebá sira apoiu mós ami ho morál, nune’e ministru mós apoiu osan $250 ba atleta Delio,” Abilio tenik.
Antes ne’e, Primeiru-Ministru Kay Rala Xanana Gusmão, apoiu mós orsamentu privadu hamutuk $3.400 ba boxista na’in-rua atu compete iha eventu ne’e.
Aleinde ne’e, nia informa, Ministériu Juventude Desportu, Arte no Kultura (MJDAK) mós apoiu orsamentu hamutuk $3.400 ba ekipa El-Matador hodi tuir kompetisaun iha HSS Bali.
Notísia Relevante: Xanana apoia boxista Delio-Daniel tuir kompetisaun HSS iha Bali
Jornalista : Hortencio Sanchez
Editór : Cancio Ximenes
