DILI, 10 fevereiru 2025 (TATOLI)–Deputada opozisaun husi Bankada Partidu Libertasaun Populár (PLP), Maria Angelina Sarmento, sujere ba Governu atu aseita tan voo seluk atubele iha kompetitividade.
“Aseita tan airlane seluk mai Timor-Leste atubele iha kompetitividade ho airline sira seluk ne’ebé ezistente, pur exemplu hanesan bá Indonézia, se la sala ita asina Air Service Agreement (ASA) ita iha slot 24 maibé 24 pur semana, maibé ita foin prienxe de’it 14 slot per week, entaun sei menus 14 slot ne’ebé mak fó mai ita bazeia ba ASA ne’ebé ita halo,” Deputada hato’o liuhusi reuniaun plenária, iha Parlamentu Nasionál (PN), segunda ne’e.
Nia dehan, haree ba oportunidade atu tama ba ASEAN, bainhira bele hetan kompetitividade husi voo seluk, liuliu ba Indonézia ne’e di’ak liután.
Notísia relevante : KM fó poder ba Ministru Manetelu asina akordu ho Indonézia ba espasu aéreu
Nota mós katak bainhira timoroan sira ne’ebé ho klase médiu hakarak bá vizita iha rai-li’ur, liuliu bá Indonézia, sira prefere liu terrestre Kupang-Indonézia.
“Ne’ebé Kupang de’it sira-nia viajen aviaun fly pur dia ne’e 9 até 11, ita-nia rua de’it Citilink no Aero Dili, maibé ita loke tan, se la sala iha tinan hirak liubá iha mós diskusaun airline balun ne’ebé hakarak mós atu investe hanesan Air Asia, tanba klase médiu ne’e ema só bele ho presu ne’ebé razoável liuhusi viajen terrestre Indonézia,” nia akresenta.
Tuir Deputada ne’e, bainhira liu Kupang ema haree oportunidade negósiu ne’e boot liu no kustu kiik, liuliu ba estudante sira.
“Maibé bainhira ita loke tan oportunidade ba airline seluk, nia efeitu multiplikadór seluk mós iha, ba ida-ne’e hanoin Governu bele haree took tanba ida-ne’e la’ós foin ita ko’alia atu fó oportunidade, maibé ASA iha duni ita-nia slot, maibé to’o agora ita seidauk atinje, se ita haree ba adezaun ASEAN kumprimentu mós ba akordu sira ne’e,” nia tenik.
Subsídiu ba Roo Success
Iha sorin seluk, Deputadu Bankada Governu husi Congresso Nacional da Reconstrução Timorense (CNRT), Firmino Taeki, husu ba Governu atu apoiu subsídiu ba Roo Success, ne’ebé durante ne’e apoiu povu Oekusi no Timor tomak hodi hala’o viajen husi Dili-Oekusi bá-mai.
“Husu tau atensaun ba Roo Success tanba durante ne’e problema roo bá Oekusi ne’e laiha ona,” nia katak.
Nune’e mós, Deputadu Bankada CNRT, Natalino dos Santos, husu ezekutivu atu fó subsídiu ba Roo Success tanba durante ne’e apoiu movimentu povu Oekusi bá-mai.
Reprezentante Governu liuhusi Vise-Ministru ba asuntu Parlamentár Adérito Hugo da Costa, rejista intervensaun husi Deputadu sira no kompromete sei enkamiña ba ministériu tutela.
Jornalista : Nelson de Sousa
Editora : Julia Chatarina
