MANATUTU, 10 fevereiru 2025 (TATOLI)-Hafoin hala’o tiha eleisaun iha primeira-ronda iha Suku Iliheu, Postu administrativu Manatutu, Munisípiu Manatutu, ne’ebé konkorre husi kandidatu na’in tolu la konsege prenxe kriteiru 50%+1 ikusmai kontinua hakat ba segunda-volta nune’e, iha segunda ne’e, eleitór sira iha suku Iliheu kontinua partisipa hodi eleze kandidatu na’in rua mak hanesan Antoninho Soares no Francisco Paulo Soares.
Eleitór sira espera, ho xefe suku foun ne’ebé sira hili daudaun, bele lori mudansa ba sira liu-liu problema sosiál sira ne’ebé komunidade enfrenta liu-liu bee-moos no estrada liga ba aldeia sira iha suku Iliheu nian no problema sira seluktan.
Tuir votante António Soares, sira fó ona votu ba kandidatu ne’ebé sira Depozita konfiansa ba tanba ne’e sira hein ho Xefe suku foun ne’ebé eleitu sei tau-matan ba sira liu-liu bee-moos, estrada no tau-matan ba idozu no terseira idade sira.
“Ami fó ona ami-nia votu ba xefe suku ne’ebé ami hakarak no ami hein katak xefe suku ne’ebé eleitu sei tau-matan mai ami liu-liu ba idozu sira no mós tau-matan ba ami-nia estrada sira no mós bee-moos tanba ida-ne’e mak ami povu ki’ik nia hakarak,” Eleitór António hateten, hafoin ezerse direitu votu iha sentru votasaun iha suku Iliheu, segunda ne’e.
Alende ne’e, Marta de Jesus Soares, hanesan joven ida afirma katak xefe suku foun tenke akumula joven sira hodi kria atividade nune’e joven sira bele hadook aan husi problema sira.
“Xefe suku foun mai tenke kria amizade entre joven sira liu-liu kria atividade desportu nian nune’e halibur hamutuk joven sira ho hanoin ida di’ak hodi lori suku ne’e la’o ba oin no dezenvolve di’ak liután,” joven ne’e hateten.
Kompromisu kandidatu xefe suku sira
Entretantu kandidatu Xefe suku na’in rua ne’ebé kompete iha eleisaun demokrátiku ne’ebé organiza direita hosi Ministériu Administrasaun Estatál (MAE) ne’e garante katak baihira povu fó konfiansa ba sira, sei serbisu maka’as kondena ho autoridade munisipál no Governu Sentrál hodi hakbesik dezenvolvimentu ba povu.
Tuir kandidatu Xefe Suku Iliheu ne’ebé daudaun asume hela knaar hanesan hanesan xefe suku interinu, Francisco Paulo Soares, bainhira povu fó konfiansa hodi lidera suku Iliheu sei servisu maka’as hamutuk ho povu no koordena ho autoridade kompotente hodi hakbesik dezenvolvimentu ba suku.
Nia hatutan, hanesan sidadaun ida no joven ida iha suku referidu, populasaun lubuk mak apoia nia kandidatura ba xefe suku hodi kontinua lidera suku ida-ne’e
“Tanba ne’e, karik sira fó fiar nafatin mai ha’u kontinua lidera suku ida-ne’e mak ha’u sei servisu maka’as ho povu liu-liu servisu hamutuk mós ho autoridade postu munisípiu no Governu sentrál hodi hakbesik dezenvolvimentu mai suku ne’e,” kandidatu Xefe suku ne’e hateten.
“Problema seluk ne’ebé ha’u tau prioridade mak estrada sira liga ba aldeia rurál sira ne’ebé daudaun ne seidauk di’ak no mós kontinua tau-matan ba povu liuliu problema sosiál seluk ne’ebé suku ne’e hasoru,” nia reforsa.
Iha sorin seluk, Kandidatu xefe suku Antoninho Soares afirma, baihira povu Iliheu fó fiar ba nia lidera suku ne’e mak nia sei esforsu identifika problema sira ne’ebé povu enfrenta hodi kanaliza ba parte kompotente hodi tau-matan no halo dezenvolvimentu ba suku ne’e.
“Hanesan Iliheu oan ha’u prontu fó aan kontribui ba dezenvolve suku ida-ne’e tanba ne’e ha’u desidi ha’u-nia aan hodi kandidatu ba xefe suku Iliheu. Hein, karik povu fó fiar ha’u ne’e, responsabilidade boot ida mai ha’u oinsá lori mudansa ba suku ida-ne’e liu-liu oinsá bele rezolve problema sosiál sira ne’ebé populasaun sira iha, iha aldeia iha liu área rurál enfrenta hanesan bee-moos, estrada, eletrisidade no mós problema seluk,” Francisco Paulo Soares garante, hafoin ezerse votu iha Sentru votasaun Iliheu.
Kandidatu xefe suku na’in rua ne’e kompromete katak manan ka lakon nafatin kolabora no serbisu hamutuk hodi dezenvolve suku Iliheu ba futuru ho di’ak liután.
APA Manatutu Vila observa direta
Iha sorin seluk, Administradór Postu Administrativu Manatutu Vila, José Pedro da Costa observa direta atividade sufrajiu ne’e tanba eleisaun órgaun suku ne’e organiza direta hosi MAE tanba ne’e autoridade postu iha papél importante hodi monitoriza.
Autoridade ne’e esplika, eleisaun ida-ne’e hanesan eleisaun órgaun suku nian ne’ebé hala’o tiha ona iha loron 25 janeiru liubá maibé tanba la iha kandidatu ida manan maioria no la prenxe rekezitu ne’ebé iha nune’e ohin realiza fali eleisaun segunda-volta nian hodi hili xefe suku foun.
“Hanesan ita hatene suku ne’e la’ós suku foun maibé suku ne’e suku tuan tanba nia xefe suku tinan kotuk mate nune’e realiza fali eleisaun hanesan suku foun sira seluk hodi subtitui xefe suku interinu ne’ebé daudaun lidera provizóriu hela suku ne’e,” administradór manatutu Vila hateten, iha suku Iliheu, ohin.
Entretantu, eleisaun primeira-volta iha suku Iliheu, kandidatu sira ne’ebé kompete mak Antoninho Soares ho votu hamutuk 183, kandidatu Jentelino G. Soares ho votu 169, kandidatu Francisco Paulo Soares ho votu 342 no ho nune’e hakat ba segunda-volta mak kandidatu Antoninho Soares no kandidatu Francisco Paulo Soares tanba sira la prenxe kritériu 50%+1.
Eleisaun segunda-volta órgaun suku iha Suku Iliheu, Postu administrativu Manatutu vila loke hahú tuku sia dadeer no taka tuku tolu lorokraik.
Atividade eleitorál ne’e superviziona husi CNE (Komisaun Nasionál Eleisaun, sigla portugés) no apoiu tékniku husi STAE (Sekretariu Tékniku Apoiu Administrasaun Eleitoeál) no hetan seguransa másima husi Komandu PNTL, Munisípiu Manatutu.
Jornalista: Anito Soares
Editór :Rafael Ximenes de A. Belo
