BOBONARU, 10 fevereiru 2025 (TATOLI)—Diresaun Servisu Munisipál Edukasaun Autoridade Munisípiu Bobonaru, hatudu dadus estudante husi Ensinu Pre-Eskolar to’o Ensinu Báziku terseiru siklu públiku no katolika hamutuk na’in rihun 29,078 sai benifisiáriu ba Programa Merenda Eskoáar (PME) tinan 2025 ho totál orsamentu $1,758,783,60.
Diretór Servisu Munisipál Edukasaun Munisípiu Bobonaru, Miguel Freitas, relata estudante hirak ne’e husi totál estudante Ensinu Baziku no Pre-Eskolar publiku 26,561 no Ensinu Baziku no Pre-Eskolar Katoliku 2,562, nune’e totál estudante iha Bobonaru hamutuk 29,078.
Notísia Relevante: Menu merenda eskolár iha Ermera no Bobonaro ho ikan tilapia
“Totál akumulasaun númeru estudante Ensinu Baziku, pre-eskola públiku ho Katóliku hamutuk iha rihun 29,078 mak atu asesu hahan ba Programa Merenda Eskolár tinan 2025,” Nia aprezenta dadus ne’e iha Reuniaun Konsellu Koordenasaun Munisipál 2025 ne’ebé realiza iha salaun Maria-Tapo, segunda ne’e
Programa ne’e, nia dehan, sei implementa iha eskola públiku hamutuk 179 ne’ebé kompostu husi Ensinu Báziku 137 hanesan Ensinu Báziku Sentrál (EBC Sigla Portugués) 23 no Ensinu Báziku Filiál (EBF) 114, enkuantu Ensinu Pre-Eskolar hamutuk 32.
Ba eskola privadu, nia dehan, Ensinu Báziku no Ensinu Pre-Eskola Katóliku hamutuk 24 ne’ebé kompostu husi EBC eskola neen (6), EBF iha eskola 10 no Ensinu Pre-Eskola Katóliku hamutuk ualu (8).
Antigu Diretór EBC Gumer ne’e hatutan, husi montante orsamentu PME millaun $1-resin ne’e fahe ba Ensinu Báziku públiku no Katóliku hamutuk $1,564,829,28 ho totál loron efetivu 141, enkuantu Pre-Eskolár Públiku no Katólika hamutuk $193,954.32 ba loron efetivu 174.
Diretór ne’e afirma, rede monitorizasaun ne’ebé sei monitoriza implementasaun PME 2025 mak hanesan Servisu Munisipál Edukasaun, Inspetór Eskola hotu, ALMA Edukasaun, Ajénsía Fiskalizasaun Munisípiu, Ajénsía Planeamentu, Diresaun Servisu Munisipál Seguransa Alimentár, Servisu Munisipál Saúde, Koordenadór Merenda Eskolár Postu Administrativu no Xefe suku 50 ho xefe aldeia 193.
“Sira-ne’e mak ami husu Ajuda ba Merenda Eskolár ne’ebé implementa iha baze, atu nune’e ita bele tau-atensaun hamutuk. Ho nune’e, programa ida-ne’e bele la’o tuir hotu-hotu nia hakarak,” Miguel Freitas dehan.
Enkuantu, Ekipa Jestaun Programa (EJP) ba Programa Merenda Eskolár (PME) tinan 2024 iha Munisípiu Bobonaru hamutuk na’in-38.
Notísia Relevante: Edukasaun Bobonaro deteta erru barak iha implementasaun programa merenda eskolár
Jornalista : Sérgio da Cruz
Editór : Cancio Ximenes
