DILI, 10 Fevereiru 2025 (TATOLI) – Fundu Mina-rai Timor-Leste iha trimestre ikus tun ba billaun $18,27, kompara ho billaun $18,97 iha trimestre dahuluk hafoin ajusta tiha ‘fair value’ dívida privada ba 2024, haktuir relatóriu husi Banku Sentrál Timor-Leste (BCTL, sigla portugés).
Liuhusi konferénsia imprensa, Diretór-Ezekutivu BCTL, Tobias Ferreira, dehan relatóriu ne’e mós hatudu katak totál reseita mak simu iha trimestre ne’e hamutuk millaun $11,82.
Ba rendimentu brutu husi investimentu fundu nian hamutuk millaun -$251,29, kompostu husi kupaun no dividendu ne’ebé simu mak millaun $128,80, mudansa iha valór merkadu nian millaun -$380.01 iha trimestre ne’e.
“Ne’e rezulta rendimentu ba karteira fundu nian durante trimestre ne’e -1.03%, enkuantu rendimentu sasukat (benchmark) nian ba períodu ne’e mak -1.04%”, informa iha salaun BCTL, ohin.
Nia salienta katak diferensa entre retornu totál portofóliu no pontu referénsia iha periodu ne’e mak pozitivu 0,13 pontu de baze ka pozitivu porsentu 13. Dezempeñu retornu fundu nian hahú husi inísiu mak porsentu 4,48.
“Osan kontadu líkidu ne’ebé sai husi fundu durante trimestre ne’e hamutuk millaun $454,51, kompostu husi millaun 450 transfere ba orsamentu Estadu no millaun $4,51 kobre kustu jestaun nian”, dehan.
Rendimentu portofóliu instrumentu merkadu finanseiru iha períodu trimestre ne’e mak -1,03% kompara ho rendimentu referénsia mak -1.04%.
Notísia relevante: BCTL fó sai Relatóriu Trimestrál Fundu Petrolíferu billaun $18.97
Jornalista: Arminda Fonseca
Editora: Maria Auxiliadora
