DILI, 10 fevereiru 2025 (TATOLI)— Governu liuhusi Ministériu Komérsiu no Indústria (MCI-sigla portugés) kontinua apoiu micro, pequeno no média empreza sira iha Timor-Leste liuhusi hadi’a fasilidade.
“Ami durante ne’e vizita empreza ki’ik sira iha Manatuto, Baukau no sira iha prontidaun no hatudu sira-nia vontade atu halo negósiu iha munisípiu sira. Ezemplu, Manatuto sira halo atividade kle’ur ona hanesan iha área Ilimanu nian ne’ebé fa’an bote, lafatik no kohe. Sira-ne’e presiza fatin ne’ebé mak seguru atu sira fa’an sasán. Kestaun ida-ne’e ami iha ona prosesu diskusaun nian atubele fasilita sira atu prepara fatin ne’ebé mak apropriadu hodi sira bele fa’an ho di’ak,” Ministru Komérsiu no Indústria, Filipus Nino Pereira dehan ba jornalista sira iha Centro Convenções de Dili, segunda ne’e.
Nia dehan, produtu balun fa’an iha supermerkadu sira tenke hasa’e volume distribuisaun no Governu presiza hadi’a embalazen nune’e bele atrativu iha merkadu sira.
Notísia relevante: Mikro pekena no média empreza importante ba dezenvolvimentu nasaun
“Produtu balun hanesan banin-been tama ona iha supermerkadu sira, entaun ami sei husu ba supermerkadu sira atu hasa’e tan volume distribuisaun no ami mós hadi’a sira-nia embalazen tanba embalazen ne’ebé sira halo ne’e ladún atrativu ida,” nia haktuir.
Nia hateten, munisípu Baukau ekipa sira fó ona treinamentu oinsá bele asesu bá iha kréditu no mós embalazen sira atu fasilita sasán nune’e bele koñese liután iha merkadu.
“Ita-nia apoiu ne’e ba munisipiu hotu-hotu, entaun ida-ne’e mak parte ida husi ita-nia vizita atu haree direta kondisaun mínimu sira. Atividade saida mak sira halo ne’e tulun no diversifika ita-nia produtu inklui kria kampu serbisu ba joven sira seluk,” nia konklui.
Jornalista: Felicidade Ximenes
Editór: Xisto Freitas da Piedade
