DILI, 10 Fevereiru 2025 (TATOLI)-Kandidatu xefe suku nain-lima eleitu ona husi eleisaun segunda volta ne’ebé hala’o, ohin iha suku Iliheu, Poetete Vila, Poetete Lodudu, Kutete no Meno Meko.
Eurico Soares de Jesus eleitu ba xefe suku Poetete Lodudu, Arsenio Amaral ba xefe suku Poetete Villa husi munisípiu Ermera, postu administrativu Ermera.
Munisípiu Manatutu, postu administrativu Manatutu, suku Iliheu, eleitu husi Francisco de Paulo Soares. Enkuantu, Rejiaun Administrativa Espesiál Oekusi-Ambenu, postu administrativu Pante Makassar, suku Mone Meko eleitu husi José Sani no suku Kutete sei ukun husi José António Bana.
“Husi observasaun nota prosesu votasaun no kontazen la’o ho di’ak no la rejista insidente ruma”, Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, informa via telefone, segunda ne’e.
Nia dehan tasa partisipasaun 62.77%.
Rezultadu apuramentu sei hala’o iha loron 11 Fevereiru 2025 iha sede suku. Daudaun ne’e halo hela kontajen.
Segunda volta ne’e, nia haktuir kandidatu rua de’it maka kompete, tanba ne’e aplika de’it maioria simples, katak sé mak votu barak liu nia mak manán. Liu votu ida de’it mós manán ona no la aplika 50%+1.
Husi suku lima, lokál votasaun realiza iha aldeia 13. Votasaun hahú tuku 9.00 no termina tuku 15.00, kontinua kedas ho kontajen votu inisiál.
“Lian nain no reprezentante joven feto no mane ba suku lima segunda volta sei akontese iha 21/02/2025. Eseptu, suku Iliheu laiha eleisaun ba lia-nain no reprejentante joven mane no feto, tanba suku tuan eleisaun ba de’it xefe suku”, nia dehan.
Notísia relevante: Governu distribui ona materiál eleisaun suku ba munisípiu ualu
Jornalista : Osória Marques
Editora : Rita Almeida
