DILI, 10 Fevereiru 2025 (TATOLI) – Ministru Planeamentu no Investimentu Estratéjiku, Gastão de Sousa, informa prosesu konstrusaun ba merkadu modernu tolu iha munisípiu Lautein, Baukau no Ermera iha ona konkursu públiku.
“Prosesu agora iha ona Komisaun Nasionál Aprovizionamentu [CNA]. Duransaun konkursu durante fulan tolu, ne’ebé ita hein fulan tolu ne’e iha ona kompañia manán atu hahú prosesu konstrusaun, tanba tuir planu konstrusaun tenke halo iha tinan ne’e”, Gastão de Sousa dehan ba Tatoli.
Relembra katak iha loron 01 agostu 2024 Ministériu Komérsiu Indústria (MKI) entrega ona dokumentu konstrusaun merkadu modernu foun iha Baukau, Lautém no Ermera ba MPIE hodi hakat ba faze konkursu públiku.
Dokumentu ne’e entrega direita husi Vise-Ministru Komérsiu no Indústria, Augusto Junior Trindade, akompaña husi Diretór Nasionál Internu, Gabriel de Jesus da Costa, ho ekipa ba Ministru Planeamentu no Investimentu Estratéjiku, Gastão de Sousa. Dokumentu ne’ebé entrega ba MPIE ne’e hahú husi estudu viabilidade to’o planta no kedernu enkargu (BoQ, sigla portugés).
Orsamentu ba obra ne’e liuhusi grande projetu ne’ebé Governu prevee ba konstrusaun merkadu munisipál ba Lautein millaun $13, Baukau $12 no Ermera $11.
Vantajen husi merkadu modernu foun ba munisípiu tolu ne’e mak atu akomoda hotu vendedór sira iha kada munisípiu hodi fasilita sira halo negósiu ho di’ak no ekonomia mós bele la’o ho adekuada.
Notísia relevante: MKI entrega dokumentu konstrusaun merkadu modernu foun tolu ba MPIE
Jornalista: Arminda Fonseca
Editora: Maria Auxiliadora
