DILI, 10 fevereiru 2025 (TATOLI)—Deputada Opozisaun husi Bankada Partidu Libertasaun Populár (PLP), Maria Angelina Sarmento, nota Merkadu Taibesi dezorganizadu no laiha kondisaun dignu ba vendedór sira, nune’e husu atu Autoridade Munisípiu Dili (AMD) bele hadi’a.
“Ha’u hakarak foti iha ne’e, kona-ba oinsá mak Governu bele organiza merkadu, ita foti dala hira ona, merkadu Taibesi ita bele dehan dezorganizadu, laiha kondisaun dignu ba vendedór sira atu fa’an sasán iha ne’ebá no fatin sira ne’e ita bele dehan laiha ijiene no casa de banho, laiha estasionamentu tanba vendedór okupa hotu estasionamentu ba motorizada no karreta. Vendedór sira ne’ebé fa’an hahán matak, hahán tasak, fa’an roupa iha hotu estasionamentu karreta nian,” Deputada Angelina Sarmento hato’o liuhusi reuniaun plenária, iha Parlamentu Nasionál (PN), segunda ne’e.
Notísia relevante : Governu planeia atu revitaliza merkadu Taibesi sai sentru komersiál
Nia observa, Governu hasai vendedór ambulante iha dalan ninin atu muda ba merkadu, maibé kondisaun iha merkadu rasik la prepara.
“Ne’ebé hanoin se ita hasai ema husi fatin públiku, ema haree Merkadu Taibesi no Merkadu Manleuana hanoin pelumenus, maibé Merkadu Taibesi laiha kondisaun para ema atu fa’an iha ne’ebá,” nia preokupa.
Nune’e, Deputada ne’e husu atu tau-atensaun ba kondisaun iha merkadu hodi organiza didi’ak tanba tinan barak ona mak reprezentante povu sira iha Uma-Fukun foti kestaun ne’e maibé laiha solusaun.
Antes ne’e, Deputadu balun husi Bankada Opozisaun no Governu preokupa tanba iha Merkadu Taibesi, vendedór sira utiliza estasionamentu transporte hodi halo atividade negósiu, kondisaun la ijiene no seluk tan.
Reprezentante Governu liuhusi Vise-Ministru Asuntu Parlamentár, Adérito Hugo da Costa, rejista preokupasaun hirak ne’e no sei enkamiña ba entidade tutela hodi tau-atensaun.
Jornalista : Nelson de Sousa
Editora : Julia Chatarina
