VIKEKE, 10 fevereiru 2025 (TATOLI)—Prezidente Autoridade Munisípiu (PAM) Vikeke, Francisco Cruz Simões de Gonzaga Soares, husu Diretór Servisu Ministériu Agrikultura. Pekuária, Peska no Floresta (SMAPPF) Viqueque hodi buka solusaun ba manutensaun tratór-boot sira-ne’ebé kondisaun aat.
“Ha’u husu diretór oinsá solusiona ba manutensaun tratór boot sira-ne’ebé kondisaun aat, la hatene husi nasionál mak halo manutensaun ka munisípiu mak atu halo manutensaun, tanba tratór boot sira seidauk halo manutensaun,” PAM Vikeke ne’e hateten iha sorumutu entre diretór servisu munisipál sira, iha segunda ne’e.
Nia dehan, tenke aselera halo manutensaun nune’e bele apoiu ba grupu agrikultór sira hala’i natar hodi hasa’e produsaun hare iha munisípiu Vikeke.
“Liuhusi sorumutu sira-ne’e ita bele fó hanoin ba malu hodi fó solusaun ba ita-nia problema sira-ne’e, hodi rezolve. Ha’u husu diretór kontaktu ba nasionál haree tartór sira-ne’e. Tanba ha’u hanoin tratór sira-ne’ebé bele hadi’a, halo manutensaun hodi ita bele uza fila-fali,” nia dehan.
Hatán ba preokupasaun ne’e, Diretór SMAPPF Vikeke, Olivio Soares Freitas, relata tratór boot iha munisípiu Vikeke iha 2007 nian ne’e hamutuk unidade 39 maibé unidade 17 mak aat, maibé bele halo manutensaun no unidade 17 mak labele halo manutensaun tanba kondisaun aat totál.
“Nune’e tratór boot ne’ebé ita simu iha tinan 2007 daudaun ne’e hela tratór unidade lima (5) mak kondisaun di’ak. Durante ne’e manutensaun ba tratór boot no mina konbustível diretamente husi MAPPF nasionál no orsamentu na ida-ne’e hotu. Nune’e, ba manutesaun tratór boot ne’e foin lalais, 27 janeiru 2025, ami enkontru ho Ministru ha’u hato’o ona maibé buat ne’ebé ministériu hasoru mak prosesu konkudrsu públiku, tanba buat hotu tenke liuhusi konkursu mak foin sosa sasán ba manutensaun nian, ne’ebé to’o agora sasán seiduak iha. Bainhira seidauk halo manutensaun ita labele mehin dehan hasa’e produsaun. Tan ne’e, ita hein de’it, bainhira mak sira mai halo manutensaun, mak foin ita halo operasaun. Se sira la mai, ita labela halo manutensaun,” nia hateten.
Kona-ba konbustível, nia dehan, konbustível ba tratór boot iha tinan 2024, SMPPF Vikeke simu tonelda lima (5) ne’ebé dadauk ne’e sei iha hodi fornese ba tratór bo’ot sira hodi hala’i natar ba epoka ida-ne’e.
Entretantu, tuir dadús tratór boot iha munisípiu Viqueque kondisaun di’ak hamutuk unidade 11 no husi númeru ne’e unidade foun hamutuk neen (6) no unidade tuan iha lima (5).
Tratór boot unidade foun lima (5) ne’e koloka ba kada postu administrativu lima (5) no kada postu ida hetan unidade ida no atuál iha SMAPPF Vikeke hamutuk neen (6).
Notísia Relevante: MAPPF sei halo levantamentu ba tratór boot iha Viqueque
Joranlista : Vitorino Lopes da Costa
Editór : Cancio Ximenes
