BOBONARU, 11 fevreiru 2025 (TATOLI)–Komandante Unidade Patrullamentu Fronteira (UPF), Superintendente Polisía Euclides Bello, tersa ne’e, observa direta projetu reablitasaun Postu UPF unidade 41 ne’ebé Governu liuhusi Ministériu Interiór (MI) konstrui no halo melloramentu espasu iha fronteira.
Nia hateten, obra hirak ne’ebé konstrui husi parseiru TLPDP ne’e implementa iha kompañia Alfa munisípiu Bobonaru, Kompañia Bravo Kovalima no Kompañia Carlye Oekusi ne’e, nu’udár obra ne’ebé Governu konstrui iha tinan hirak liuba no postu hirak ne’ebé halo melloramentu ba espasu liuliu dapur no seluk tan.
Notísia Relevante: MI reabilita postu UPF 41
“Ita iha totál postu husi kompañiá Alfa, Bravo ho Carlye iha fronteira tomak ne’e hetan melloramentu no reablitasaun totál 41. Seidauk konta ho postu integradu neen (6) ne’ebé daudaun ne’e seidauk iha desizaun para bele kontinua, liuliu postu Mota-Ain, Mozon, Salele, Sakato, Oesilo nomós Citrana,” Nia informa ba jornalista sira iha Saburai, hafoin vizita Reablitasaun Postu UPF iha suku Tapo-Memo, Saburai no Lontama, postu administrativu Maliana, munisípiu Bobonaru.
Superintendente Euclides Belo esplika, vizita ne’e oinsá atu monitoriza obra ne’ebé kompañia sira implementa hodi garante ninia kualidade ne’ebé bele dura ba tempu naruk.
Tuir nia observasaun, prosesu hotu-hotu la’o ho di’ak maibé ladún la’o ho lalais tanba hetan impedimentu husi klima, udan no anin ne’ebé la fó tempu atu aselera servisu.
“Ita espera katak durasaun tempu ne’ebé determina, sira sei kumprimenta tuir akordu ne’ebé iha husi parte kompañia ho Ministeriu Interiór. PNTL hanesan na’in ba obra ne’e, ami iha kooperasaun no komunikasaun atu obra ne’e bele la’o tuir prosedimentu hotu-hotu ne’ebé iha. Kualidade mak númeru um, ita-nia interrese mak postu ne’e ho kualidade atu membru sira bele halo servisu, mezmu sei falta rekursu,” nia dehan.
Tuir nia, obra ne’e bele fó satisfasaun ba membru sira atu hala’o servisu hodi garante seguransa iha liña fronteira terrestre entre Timor-Leste no Nasaun Viziñu Indonezía.
Enkuantu, Governu mós tau ona prioridade atu halo reablitasaun ba postu Integradu UPF unidade neen (6) iha Mota-Ain, Mozon, Salele, Sakato, Oesilo no Citrana.
Notísia Relevante: Autoridade Pássabe husu Ministériu Interiór aumenta postu UPF iha fronteira
Jornalista : Sergio da Cruz
Editór : Cancio Ximenes
