OEKUSI, 11 Fevereiru 2025 (TATOLI) – Ministériu Administrasaun Estatál (MAE), tersa ohin, distribui materiál eletrónika hanesan komputadór unidade 22 ba suku 20 iha Rejiaun Administrativa Espesiál Oekusi Ambenu (RAEOA).
Biban ne’e, Ministru Administrasaun Estatál (MAE), Tomas do Rosário Cabral, hateten komputadór sira-ne’e apoia atu priénxe fali livru 18 iha suku sira, kona-ba totál populasaun, jeográfia suku, monográfia, demográfia, ne’ebé durante ne’e ladún la’o.
Notísia relevante:MAE apela ba xefe suku 18 iha Oé-Cusse uza motorizada tuir regra Estadu
“Komputadór ida ne’e ba sistema ketak tanba ho komputadór ne’e ba funsionáriu asuntu sosiál suku nian, nune’e bele halo atividade sira-ne’e, atu ita bele iha dadús loloos kona-ba populasaun ne’e hira, unidade jeográfia ne’e oinsá, iha poténsialidade iha ne’ebé, servisu agrikultura, programa merenda eskolár labarik hira mak asesu, ne’e mak iha livru. Tanba durante ne’e la la’o entaun ho ida-ne’e bele ajuda funsionáriu na’in-haat ne’ebé iha suku atu halo servisu sira-ne’e,” Ministru Tomas Cabral, dehan iha ámbitu distribuisaun ekipamentu hirak ne’e iha salaun administrasaun Numbei, ohin.
Objetivu seluk, Governante ne’e dehan halo mós dijitalizasaun tanba iha dadus bele link ho nasionál , tanba ekipamentu sira-ne’e apoia hotu munisipíu sira inklui suku 20 iha Oekusi, nune’e presiza dadus ruma bele tama ba sistema hodi hatene totál populasaun iha nivel suku no aldeia.
“Ita atu instala mós balkaun úniku, profil munisipál inklui RAEOA nian, nune’e fasilita ema ruma iha interese halo investimentu mai ita-nia rai, nia bele asesu de’it iha sistema ba dadus populasuan no rekursu sira, liuliu saúde, agrikultura, no eskola hira mak iha suku no aldeia,” nia afirma.
Iha fatin hanesan, Sekretáriu Rejionál ba Asuntu Administrasaun RAEOA, Andre Lao, agradese ba governu tanba apoia fasilidade eletrónika ba suku 20 iha Oekusi.
“Ami agradese ba Governu Sentrál tulun ami atu reforsa liutan servisu iha suku sira hodi halo atendimentu administrasaun públiku ba komunidade iha suku,”Sekretáriu Rejionál ne’e orgullu.
Regra utilizasaun ekipamentu
Iha 2024, Governu liuhusi MAE tau ona osan hodi sosa materiál eletrónika hanesan komputadór ho unidade 465.
“Totál ekipamentu komputadór ba RAEOA hamutuk 22 hodi fahe ba suku 20, mak kada suku hetan komputadór ida, maibe suku Kutete no Monemeko mak sei hetan unidade rua tanba konsidera hanesan suku foun,” nia informa.
Notísia relevante:MAE entegra ekipamentu eletróniku ba IT postu administrativu iha territóriu
Regra utilizasaun ekipamentu komputadór ne’ebe xefe suku sira tenke mak, dahuluk, Sekretáriu Administrasaun Suku no Ofisiál Assuntu Sosiál suku, mak responsável ba operasionalizasaun komputadór ida ne’e, daruak, Utilizasaun ba de’it servisu atualiza ka hatama dadus livru administrasaun suku ba iha sistema integradu Informasaun Gestaun Dadús Suku no Aldeia (SIIGSA) kada fulan.
Datoluk, Labele lori USB ka esternál oin-oin hodi tú ba iha komputadór ida-ne’e, dahaat, laiha atividade nesesáriu labele utiliza no labele fó ema seluk impresta.
Dalima, Bainhira hetan problema ka difikuldade ruma, informa servisu postu Administrativu ka Servisu Munisipál hodi hetan asisténsia téknika imediatamente, daneen bainhira fila ba uma ekipamentu sira-ne’e desliga hotu ona no ikus liu labele husik komputadór moris to’o fali loron tuir mai.
“Ministériu sei regulariza didi’ak pontu hirak-ne’e liuhusi diploma ministeriál propriu ida hodi guia xefe suku sira no ofisiál servisu administrativu suku kona-ba utilizisaun ka operasionalizasaun iha terrenu,” nia dehan.
Notísia relevante:MAE kapasita xefe suku 18 iha Oé-Cusse ba administrasaun no kompeténsia
Jornalista: Abílio Elo Nini
Editór: Florencio Miranda Ximenes
