DILI, 11 Fevereiru 2025 (TATOLI)-Sekretáriu Estadu Ensinu Sekundáriu Jerál no Tékniku Vokasionál (ESTV), Domingos Lemos Lopes, hatete Ministériu Edukasaun (ME) dissemina uniforme eskolár ba dirijente eskola iha territóriu hafoin bele deside.
“Agora Ministériu Edukasaun halo disseminasaun liuhusi diretór eskola sira depois mak eskola hatutan ba inan-aman sira”, dehan nia ba jornalista sira iha salaun INFORDEPE, Balide, ohin.
Tuir nia, implementasaun uniforme eskolár la-fasil. “Ita lakohi prejudika inan-aman, liu-liu estudante sira ho presu kada unidade farda ne’e. Karik kapasidade inan-aman nian la to’o ne’ebá ita labele obriga sira atu halo, entaun ita presiza halo disseminasaun hodi bele hatene no deside”, katak nia.
Nia esplika ME la’ós prepara farda maibé regra oinsá bele regula prosesu suku no sosa farda iha eskola. “Ministériu Edukasaun fó-nia modelu kór ba munisípiu no munisípiu mak fó ba eskola sira, inan-aman sira mak prepara farda ne’e, la’ós ministériu mak prepara farda”.
Hatán konaba despaisu husi ME ba implementasaun, nia dehan lansa ona mak klaramente despaisu ne’e iha ona diretór eskola sira.
Iha fatin seluk Diretór Jerál Ensinu Sekundáriu iha ME, Deolindo da Crus, hatete ninia mekanizmu tuir akizasaun tuir lei haruka ne’ebé esplika iha artigu 42 to’o mai artigu 43 katak ME halo sensibilizasaun lai ba eskola sira depois eskola hatutan ba inan-aman, hafoin bele deside.
“Ida-ne’e mós tenke realiza enkontru kona-ba konkordansia mekanizmu akizasaun, seraké indepentemente inan-aman informadu iha responsabilidade ba suku rasik tuir kór, modelu ne’ebé eskola sira sei dissemina. Entaun, sira halo konkordansia ruma ho eskola depois eskola ho inan-aman tuur hamutuk hodi deside no koordena ida-ne’ebé no farda ne’e suku iha alfaite ka oinsá”, nia esplika.
Notísia relevante: ME hakarak prodús uniforme eskolár ne’ebé ho presu asesível
Tanba ne’e ME buka meiu oinsá halo disseminasaun ba diretór edukasaun ho diretór eskola, nune’e hatutan ba eskola sira, maibé besik loos entaun ita deside dissemina uluk ba Munisípiu Dili tanba númeru estudante boot.
Jornalista : Osória Marques
Editor : Rita Almeida
