MANATUTU, 10 fevereiru 2025 (TATOLI)- Balkaun Úniku iha Munisípiu Manatutu la’o normál no halo atendimentu ba komunidade sira hodi trata dokumentu sira hanesan Billete Identidade (BI), Pasaporte no Rejistu Kriminál, dezde lansamentu husi Primeiru-ministru Kay Rala Xanana Gusmão, iha tinan-2024.
Prezidente Autoridade Munisípiu (PAM) Manatutu, Luís Inacio Henriques Fernandes, konfirma, hafoin eziste fulan ualu Balkaun Úniku, Munisípiu Manatutu, kontinua halo atendimentu ba komunidade sira hodi trata sira-nia dokumentu.
Tuir Autoridade Munisípiu Manatutu ne’e ho Balkaun Úniku ne’ebé eziste iha Manatutu hanesan dalan ida hakbesik daudaun servisu sentrál sira ba munisípiu no hakbesik governasaun ba populasaun sira.
“Balkaun Úniku Manatutu lansa iha loron 5 maiu 2024 tama ona ba fulan ualu ita hala’o atendimentu ba komunidade sira ne’ebé mai trata dokumentu hanesan Pasaporte, Billete Identidade no rejistu kriminál. Númeru trata dokumentu boot bebeik tanba ne’e rekursu sira ne’ebe apoiu servisu Balkaun Úniku na’in rua husi Ministériu Adminitrasaun Estatál no na’in rua husi Ministériu Justisa no servisu notariadu ajuda malu. Karik, iha fallansu ruma bele trata iha servisu notariadu ne’ebé ema bolu servisu delegasaun territóriu, ne’ebé prezensa Balkaun Úniku ajuda tebes komunidade duke antes ne’e ba hala’o tratamentu dokumentu iha Dili,”. PAM Manatutu, Luís Inacio Henriques Fernandes, iha edifísiu Autoridade munisípiu Manatutu, segunda ne’e.
PAM Manatutu ne’e afirma, dezafiu mak rekursu natoon maibé populasaun sira barak liu trata dokumentu tanba ne’e bainhira volume populasaun aumenta makaas sei aumenta tan pesoál sira hodi hala’o atendimentu di’ak liután ba komunidade sira.
Iha fatin hanesan, Asistente Balkaun Úniku, Lorenço Ximenes informa katak tratamentu ba Pasaporte, provizoriamente, semana ida iha loron rua mak tersa no sexta no númeru másimu 20. Enkuantu, BI no Rejistu Kriminál atende lorloron ho númeru husi entre 50 no 80 loron ida
“Atendementu ne’ebé ami halo sempre la’o diak ba sidadaun sira kuandu sedauk hetan informasaun ami sempre fornese informasaun ba aplikante sira kona-ba rekezitu ne’ebé mak presiza nune’e sira bele komprende hodi trata dokumentu,” Lourenço Ximenes ba TATOLI, iha Manatutu vila.
Pesoál atendimentu ne’e enfáze, tratamentu Pasaporte alende hala’o ba postu neen iha munisípiu Manatutu hala’o mós atendimentu ba munisípiu sira seluk.
Atendimentu di’ak
Enkuantu, Mario Bendito Soares Carvalho sente kontenti ho atendimentu pesoál servisu Balkaun Úniku Manatutu nian tanba bele atende sira trata dokumentu ho di’ak no tuir oráriu.
“Antes ne’e ha’u mai hatama ha’u-nia dokumentu durasaun semana ida de’it, prosesu la’o normál, atendimentu la’o ho di’ak to’o ohin loron bele foti fali ha’u-nia Billete Indentidade foun, sira atende ho di’ak ho kapás. Ha’u satisfaz loos,” Mario hateten, hafoin foti nia BI iha Balkaun Uniku Manatutu.
Entertantu portál balkaun Uniku manatutu lansa hosi Primeiru Ministru, Kay Rala Xanana Gusmão iha tinan kotuk hodi promove prosesu desentralizasaun no prestasaun servisu iha nível lokál.
Balkaun Úniku hanesan rezultadu projetu parseria entre Programa Nasoins-Unidas ba Dezenvolvimentu (PNUD) no Ministériu Administrasaun Estatal (MAE) hanesan inovasaun importante ida husi Governu atu lori servisu públiku hodi besik ba sidadaun sira.
Balkaun Úniku mós bele fasilita informasaun kona-ba servisu munisípiu nian no notariadu sira hanesan, prosedimentu administrativu, taxa, nune’e mós kanál ba sidadaun sira atu ativamente fó sujestaun kona-ba oinsá atu hadi’a prestasaun servisu. Edifísiu Balkaun Úniku iha dezeñu ida-ne’ebé amigável, modernu, konfortável no asesivel.
Alende fasilita informasaun sira iha edifísiu Balkaun Úniku, informasaun sira mós bele hetan ho gratuita iha portál Balkaun Úniku ne’ebé konverte ona ho portál munisípal nian ho dadus sira liga ho aréa sira hanesan dadus populasaun, agrikultura, rekursu minerais, fasilidade saúde, protesaun sosiál, edukasun, língua no relijiaun.
Jornalista : Anito Soares
Editór : Rafael Ximenes de A. Belo
