DILI, 12 Fevereiru 2025 (TATOLI) – Eletrisidade de Timor-Leste (EDTL) asina, iha Marsu, Power Purchase Agreement (PPA) ho empreza konsórsiu internasionál EDF Renouvelables International husi Fransa no ITOCHU Corporation husi Japaun.
Prezidente Komisaun Ezekutiva EDTL, Paulo da Silva, hateten progresu serbisu ba implementasaun projetu Photovoltoltaics (PV) Manatutu ne’e daudaun iha faze finalizasaun dokumentu ba akordu nian.
“Entaun, ita-nia espetativa iha Marsu sei bele halo asina Power Purchase Agreement ho kompañia manán-na’in no Abríl ita haruka ba Kámara Konta halo fiskalizasaun ba kontratu. [Bainhira] akordu sira ne’e loos ona, hetan vistu ba implementasaun projetu, konsórsiu sira iha fulan-Juñu ka Jullu tinan ne’e hahú implementa ona projetu”, Paulo da Costa dehan ba Tatoli.
Nia esplika katak asinatura PPA ne’e halo tanba investimentu ida-ne’e nu’udar investimentu privadu, katak empreza sira rasik mak tau osan, konstrui, opera no halo manutensaun hotu mak fa’an de’it ninia enerjia mai EDTL.
Nia subliña katak konstrusaun no instalasaun planta solár-PV iha Manatutu ne’e rasik ho nia kapasidade mínimu 72 MW to’o 85 MW, subestasaun no armazenamentu barteria ho kapasidade 36 MWh.
“Bainhira implementasaun ne’e ramata ona ona mak sira fa’an kustu mai ita ne’e kada unidade enerjia Kilovolt-Ampere (KVA) ho folin sentavu $0,6 per kWh”, Paulo da Silva adianta.
Objetivu husi Governu hakarak investe ba projetu solár PV ne’e, tanba sei ajuda Timor-Leste halo poupansa ba despeza ba sosa gazoél ba jeradór sira iha Hera no Betano.
PPA ka Akordu ba Akizisaun Enerjia mak Kontratu Fornesimentu Eletrisidade nu’udar kontratu longu prazu ida entre produtór eletrisidade no kliente (Kliente-bele husi servisu públiku, Governu ka empreza ida).
Relembra katak, iha 13 Marsu 2023, Governu Daualuk liuhusi empresa estatál EDTL hamutuk ho Ministériu Obras Pública halo ona markasaun ba sítiu projetu Solár-PV iha postu administrativu Laleia, munisípiu Manatutu.
Investimentu ba projetu iha Laleia-Manatutu ne’e hanesan investimentu privadu, ne’ebé aplika modelu IPP (Independent Power Producer), signifika setór privadu ne’ebé manán projetu referidu no sei investe kapitál hodi halo konstrusaun, operasaun no manutensaun. Hafoin ne’e, EDTL sosa enerjia ne’ebé injeta ba liña nasionál.
Iha 23 Marsu 2023, EDTL halo pre-bid meeting ka reuniaun pré-oferta ho empreza sira ne’ebé sosa ona dokumentu konkursu internasionál kona-ba projetu Solar Photovoltaics (PV) hamutuk 70-resin.
Notísia relevante: EDTL,E.P realiza pre-bid meeting ho kompañia-sira ba konkursu projetu Solar PV
Jornalista: Arminda Fonseca
Editora: Maria Auxiliadora
