VIKEKE, 12 Fevereiru 2025 (TATOLI)— Kombatente “Zona de Maio Ossú, postu Ossú, munisípiu Vikeke, lamenta rezultadu dadús lista editál veteranu rejistadu 2009 ne’ebé taka sai ona iha 15 janeiru 2025.
Notísia Relevante: CCLN Viqueque husu kombatente ne’ebé dadus sala halo kontestasaun
“Ami konsellu veteranu no Kombatente Libertasaun Nasionál Zona 20 de Maio Ossu, ami lamenta ho lista editál ne’ebé públika iha loron 15 Janeiru 2025, iha teritóriu laran tomak,” Portavós Kombatente “Zona de Maio Ossú, postu Ossú, munisípiu Vikeke, Filomeno da Costa Guterres “Uamera”, hateten liuhusi konferénsia imprensa, iha kampu futeból, postu Ossú, kuarta ne’e.
Kona-ba lamentasaun ne’e, nia dehan, kombatente sira sente ida-ne’e hanesan Governu Konstitusionál da-sia (IX) halo diskriminasaun ba kombatente libertasaun nasionál nia dereitu ne’ebé rejistadu iha 2009.
“Ami husu Governu atu altera tiha Lei kona-ba artigu 27, lei nú. 3/2024, kona-ba estatutu antigu kombatente libertasaun nasionál ko’alia kona-ba pensaun sobreviente hateten katak ema-ne’ebé iha diretu gerrilleiru mak martir, feen no oan sira katak martir sira-ne’ebé mate ho klosan ka laiha oan, nia maun-alin ka inan-aman laiha diretu ba pensaun referidu, ida-ne’e ami la simu”, nia hateten.
Tanba ne’e, kombatente sira husu ba Governu Konstitusionál da-sia (IX) atu fó eskalaun ho grau, tenke haree no bázeia ba kombatente sira-nia durasaun ka dedikasaun servisu durante funu.
“Ami husu ba Governu liuhusi Ministériu Asuntu Kombatente Libertasaun Nasionál, kria lei ida hodi konsidera ba ema ho idade ki’ik sira-ne’ebé partisipa iha funu laran hanesan (a) labarik sira ne’ebé idade ki’ik maibé iha Frente Armada (Falintil); (b) Labarik sira idade kiik maibé partisipa ona iha Frente Klandestina; (c) Labarik idade maibé iha hotu ona baze apoiu no (d) labarik idade kiik maibe desterra hotu ba Atatro,” Nia dehan.
Kombatente sira husu atu Governu konsidera mós estrutura oranizasaun klandestina ne’ebé moris iha tempu rezisténsia nian hanesan zona no kaixa, konsidera assinatura responsável zona no kaixa nian iha dokumentu kontestasaun, tanba kaixa mak koñese ninia ema-ne’ebé servisu hamutuk.
Nune’e mós, nia husu Governu valoriza mós ema-ne’ebé hetan violasaun direitu umanu ka torturasaun tanba família iha hela ai-laran ka destera hodi kastigu iha Ataúru.
“Ami husu ba Governu atu halo loos no hadi’a tiha no konfirmadu hotu tiha mak bele taka sai dala ida, labele balun uluk no labele balu iku, ne’e ami sente la justu. Nune’e, ami mós lamenta tanba iha tempu verifikasaun, ami fó ami-nia dadus ba ekipa verefikasaun no ekipa baze dadus kompletu no loos tanba ekipa baze dadús fó sai ba ami hodi rona katak ami sente ne’e loos. Maibé, rezultadu fó sai iha lista editál 15 janeiru 2025 oin seluk. pior liután ami halo juramentu tiha ona katak labele kontesta ka reklama tan iha loron ikus maibé agora bele prienxe fali,” nia dehan.
Nia afirma, formatu kontestasaun nian karik rezultadu hanesan ne’e nafatin kombatente husi munisípiu sira sei tun bá Díli halo asaun no okupa iha Parlementu Nasionál (PN) hadi’a dadus hirak ne’e.
Iha fatin hanesan, kombatente rejistadu 2009, Celeste S. Guterres “Kakai-Miria”, reforsa atu MAKLN tau konsiderasaun ba kombatente sira-nia lamentasaun tanba kombatente balun la tama ba kategória.
Tanba ne’e, sira husu sira-nia diretu no lamentasaun ne’e ba MAKLN no Konsellu Kombatente Nasionál, tanba sira-nia grau barak mak menus husi 3 anos. Iha verifikasaun, sira hetan 8 a 14, maibé lista editál sai menus hotu, tanba ne’e mak sira lamenta ne’e.
Tuir dadús kombatente husi postu Ossú totál hamutuk na’in-1.501 no husi totál dadus
kombatente ne’ebé liu verifikasaun hamutuk na’in-5.920.
Husi númeru ne’e, kada postu administrativu hanesan Viqueque hamutuk na’in-1.442, Uatulari na’in-1.868, Uatukarbau na’in-617, Ossú na’in-1.501 no Lakluta na’in-512.
Partisipa iha konferénsia imprensa ne’ebé realiza husi kombatente rejistadu 2009 no hetan partisipasaun husi kombatente postu Ossú no akompaña seguransa husi Polísia Nasionál Timor Leste (PNTL) eskuadra Ossú.
Notísia Relevante:
Jornalista : Vitorino Lopes da Costa
Editór : Cancio Ximenes
