VIQUEQUE, 05 fevereiru 2025 (TATOLI)–Prezidente Konsellu Kombatente Libertasaun Nasionál (CCLN, sigla portugés) munisípiu Viqueque, Adriano Camara ‘Lentil’, husu kombatente munisípiu Viqueque ne’ebé rejista iha 2009 dadús editál sala ne’e foti fixa reklamsaun hodi halo kontestasaun.
Notísia Relevante: Kombatente iha Uatulari husu MAKLN reverifika dadus editál 2009
“Reklamasaun ne’e tolu; (1) kombatente sira hakarak hasa’e; (2) kombatente sira hatun grau dedikasaun no (3) reklamasaun ida hasa’e husi kombatente. Nune’e, fixa reklamasaun ami entrega hotu ona ba responsável sira-ne’ebé ba kombatente sira haree sira-nia lista mak dadus ruma sala, bele foti fixa kada responsável hodi halo reklamsaun. Maibé, to’o agora, ami seidauk hetan dadus reklamsaun husi kombatente Viqueque. Tanba ne’e, ami kontinua husu ba kombatente sira haree dadús editál bainhira sala hato’o keixa reklamasaun dentru loron 60,” Prezidente CCLN Viqueque ne’e hateten ba Agência Tatoli, iha edifísiu CCLN, Viqueque Vila, kuarta ne’e.
Tanba ne’e, veteranu ne’e dahan, orientasaun husi Ministériu Asuntu Kombatente Libertasaun Nasionál (MAKLN) haruka dadús kombatente sala halo kontesta ba ema sira-ne’ebé la merese sai veteranu no kontesta dadús sira-ne’ebé la kompletu hanesan naran sala, tinan sala, partisipasaun sala sira-ne’e.
“Orientasaun husi MAKLN ne’ebé dadús prienxe fixa reklamasaun. Nune’e mós responsável Zona sira, Nurep no Selecom sira tenke hatene ninia ema sira-ne’ebé uluk fó sira-nia kontribuisaun. Hatun grau ka hasa’e grau, responsável sira haree. Tanba, ha’u simu informasaun katak grau barak la loos maibé dadús ema hira mak la loos ne’e ha’u seidauk simu no balun hakarak hasa’e grau ba 8 a 14,” nia dehan.
Aleinde ne’e, nia hateten, kona-ba halo reverifkasaun dadus kombatente husi 2009 ne’e planu MAKLN nian hodi haree, sé mak kombatente loloos no sé mak la’ós kombatente programa ida sei mai.
“Maibé, agora ne’e, ita haree dadus kona-ba kombatente sira-ne’ebé rejista daruak iha tinan 2009 nian. Ba kombatente Uatulari sira halo konferénsia imprensa ne’e direitu sira-nian laiha problema, maibé orientasaun mai husi MAKLN sé mak la merese sai kombatente halo kontesta hodi hasai. Sé mak dedikasaun la to’o karik, halo kontestasaun. Sé mak dadus la kompletu tenke kompleta tiha, tanba ne’e orientasaun la’ós ita halo fali manifestasaun. Se ita lori manifestasaun, ita la rezolve. Liuhusi kontestasaun foin ita bele rezolve dadus sira-ne’ebé sala. Ami fó hatene ona kombatente sira hadi’a dadus sira sala ne’e,” nia esplika.
Iha fatin seluk, kombatente ka veteranu rejistadu 2009 husi suku Macadique, Manuel Gomes da Gama, sente triste tanba ninia dedikasaun ba luta libertasaun maibé iha dadus editál ne’e ninia dedikasaun hetan eskalaun ka grau dedikasaun 3 a 7.
“Ha’u sente triste haree dadus editál ne’ebé agora taka sai, tanba ha’u-nia dediaksaun ne’e sai 3 a 7 de’it. Tanba ne’e, ha’u hakarak halo kontestasaun ba Governu liuhusi MAKLN hodi hadi’a ami-nia dadus liuliu ba grau dedikasaun nian,” nia dehan.
Tuir dadús, kombatente ka veteranu iha munisípiu Viqueque ne’ebé rejista iha tinan 2009 ho totál hamutuk 7.775 no kombatente ne‘ebé lista naran editál hamutuk 5.920.
Husi rezultadu ne’e, lista validasaun ba kombatente iha Viqueque ne’e kompostu husi postu administrativu Viqueque vila hamutuk 1.442, Uatulari na‘in-1.868, Uatucarbau na‘in-617, Ossú na’‘in-1.501 no postu Lacluta hamutuk na‘in-512.
Jornalista : Vitorino Lopes da Costa
Editór : Cancio Ximens
