DILI, 12 Fevereiru 2025 (TATOLI)—Sekretariu Jerál Ministeriu Negósiu Estranjeiru no Kooperasaun (MNEK), João Freitas de Câmara, hateten prosesu reativa institutu diplomata iha Ministeriu Negósiu Estranjeiru no Kooperasaun daudaun ne’e tama ona iha faze preparasaun jurídiku.
Notísia Relevante: MNEK sei prepara kuríkulu antes reativa institutu diplomata
“Kona-ba ida-ne’e Ministru halo ona rekrutamentu ba Assesora ida hodi haree ba asuntu ida-ne’e. Ita sei prepara mós orsamentu maibé agora ita bele dehan tama ona iha faze preparasaun jurídiku, atu nune’e bele elabora nia estatutu,” Nia hateten ba Agência TATOLI iha Palásiu Prezidensiál Nicolau Lobato, Bairru Pite, kuarta ne’e.
Kna-ba kuríkulu, nia hatutan, prepara ona no tama ona iha faze juridiku bainhira finaliza foin bele tama ba faze implementasaun.
“Buat hotu ita finaliza ona mak foin bele hakat ba implementasaun. Ita sei haree, foti referénsia balun husi nasaun li’ur, ita la’ós kopia sira maibé ita atu foti sira-nia institutu diplomata sai referénsia ba ita-nian. Ita tenke haree atu halo ida-ne’ebé mak apropriadu ba ita,” nua hateten.
Antes ne’e, Ministru Negósiu Estranjeiru no Kooperasaun (MNEK), Bendito Freitas, deklara ona katak sira reativa institutu diplomata iha MNEK ne’e sei elabora uluk kuríkulu.
Nune’e mós institutu diplomata iha MNEK estabelese ona no konsege fó ona formasaun ba diplomata timoroan lubuk ida iha área espesializada sira kona-ba diplomasia, protokolu, lingua no seluk tan.
Jornalista : Hortencio Sanchez
Editór : Cancio Ximenes
