Xefe Estadu fó posse ba Kalohan sai Embaixadór TL iha Suisa-Nasaun Unida
DILI, 12 Fevereiru 2025 (TATOLI)—Prezidente Repúblika (PR), José Ramos Horta, kuarta ne’e, fó posse ba António da Conceição Kalohan hodi asume kargu nu’udár Embaixadór Timor-Leste iha Suisa no hanesan mós Embaxadór ba Nasaun Unida, ne’ebé realiza iha Palásiu Prezidensiál Nicolau Lobato, Bairru Pite.
Notísia Relevante: PR Horta nomeia Antonio Kalohan sai Embaixadór TL iha Suisa
“Agradese ba Prezidente Repúblika ne’ebé fó ona posse ba ha’u. Prioridade primeiru mak fó kontinuidade ba saida mak Embaixadóra sesante halo ona, ligadu mós ba Nasaun Unida nian,” Kalohan hateten ba jornalista sira, hafoin simu posse husi husi prezidente repúblika.
Nia dehan, duurante hala’o kna’ar iha Suisa sei hametin liután relasaun bilaterál entre nasaun rua Timor-Leste ho Suisa.
“Suisa nasaun ida-ne’ebé dook husi ita. Ita mós seidauk iha istória kona-ba kooperasaun ho sira maibé ha’u sei esforsu hametin ita-nia kooperassun liuhusi negosiasaun (loby) ha’u-nian rasik, hodi promove saida mak ita hakarak halo kooperasaun ho sira iha área ne’ebé ita presiza. Ha’u hatene iha informasaun badak balun katak Suisa durante ne’e apoiu hela finansiamentu balun mai ita-nia sosiedade sivíl sira iha Timor-Leste,” nia dehan.
Bainhira ramata posse, Kalohan halo kedan reuniaun ho Prezidente Repúblika hodi simu orientasaun molok aranka ba Jenebra hodi hala’o kna’ar diplomata nian.
“Prezidente husu atu kontinua hala’o servisu ne’ebé antes ne’e Embaixadór sira halo ona. Iha Nasaun Unida nian mak ligadu ba kestaun direitu umanu. Ida mós mak foin lalais, ita adere ona ba Organizasaun Mundiál Komérsiu. Ida-ne’e, ita tenke fó kuntinuidade,” Kalohan hateten.
Koñese Kalohan
Embaixadór António da Conceição moris iha loron 08 fulan-Outubru tinan 1964, ne’ebé ho naran revolusionáriu ka dunu nian “Kalohan”.
Kalohan nu’udar polítiku Timor-Leste nian ida no membru ida hosi Partidu Demokrátiku (PD) ne’ebé deputadu iha Parlamentu Nasionál (PN).
Durante envolve aan hanesan lider polítika, nia (Kalohan) assume ona kargu hanesan ministru iha Ministériu oioin iha Governu iha tinan 2007 to’o 2017 no iha tinan 2021 to’o ohin loron sai ona Deputadu iha Parlamentu Nasionál husi Bankada PD.
Jornalista : Hortencio Sanchez
Editór : Cancio Ximenes
