KOVALIMA, 13 fevereiru 2025 (TATOLI) – Federal Insurance (FI) Timor SA, organiza semináriu hodi partilla informasaun kona-ba sira-nia produtu seguru 11 ba autoridade no emprezáriu sira, iha munisípiu Kovalima, kinta ne’e.
Jestór Marketing Federal Insurance (FI) Timor SA, Herman Pane, dehan projetu 11 ne’ebé partilla ba autoridade sira mak hanesan, seguru ba iha uma no sasan, ekipamentu, seguru ba funsionáriu no traballadór, motorizada no karreta, seguru ba iha responsabilidade públiku, negósiu sira relasaun loja no supermerkadu ne’ebé afeita hosi dezastre, seguru ba viajen, seguru ba empreza sira, seguru ba profesionál, ba projetu fíziku, seguru ba kliente ne’ebé halo kréditu iha BNCTL.
“Organiza semináriu ida-ne’emak oinsá disemina informasaun, kona-ba ami-nia misaun ne’ebé mak iha, benefísiu husi seguru ne’e saida, oinsá ema bele komprende bele sosa uza seguru ba iha sira-nia vida, sira-nia negósiu ne’ebé mak sira iha”, Herman Pane dehan ba jornalista sira iha salaun AMC, ohin.
Iha semináriu ne’e, nia dehan, máteria ne’ebé mak aprezenta la ses husi produtu ne’ebé mak iha nune’e bainhira sira presiza iha ona koñesementu, oinsá atu uza no benefísiu husi kada produtu ne’ebé mak aprezenta ba.
Kritériu ba individu presiza dokumentu Pasaporte, Billeti Identidade (BI), Kartaun eleitorál (KE), seguru ba sira-nia uma, halo lista ba sasan uma laran no uma nia folin, ba karreta presiza dokumentu karreta KIR no STNK ne’ebé sei válidu, Karta Kondusaun no Kartaun Identidade no folin no ba empreza sira presiza iha lisensa husi empreza rasik.
Federal Insurance (FI) Timor SA, eziste hahú kedas iha 2016 no dadaun ne’e destaka ona funsionáriu sira iha munisípiu 12 inklui Rejiaun Administrativa Espesiál Oe-Kuse Ambeno (RAEOA) ne’ebé servisu iha sukursál BNCTL sira.
Sekretáriu Munisipál Administrasaun no Finansa, Albeto Moniz de Araújo orgullu Federal Insurance (FI) Timor SA bele partilla informasaun kona-ba sira-nia produtu tanba ba futuru Kovalima sai hanesan fatin indústria.
“Atividade ohin foin dahuluk organiza hosi Federal Insurance (FI) Timor SA, ou Jaminan sosial tenaga kerja foku ema ne’ebé lori transporte públiku bainhira hetan asidente sira bele hetan asuransia. Hanesan autoridade, orgullu bele mai halo semináriu hodi fahe informasaun liga sira-nia vizaun ho misaun. Ita hotu hatene katak Kovalima ba futuru sai hanesan sidade indústria” nia reforsa.
FI Timor organiza nia atividade hodi hala’o semináriu tanba hetan lisensa husi BCTL nia bele loke asuransia iha munisípiu hotu ne’ebé kontinua alarga mai ona iha Kovalima hodi konvida autoridade, parseiru dezenvolvimentu, no CCI Kovalima atu rona informasaun.
Jornalista:Celestina Teles
Editór :Rafael Ximenes de A. Belo
