DILI, 13 Fevereiru 2025 (TATOLI)-Prezidente Asosiasaun Turizmu Relijiozu Timor-Leste (ATR-TL), Padre Angelo Salsinha, informa Diozese Dili anúnsia ona fatin peregrinasaun atu manán induljénsia plenária durante tinan-jubileu mak Katedral, Na’in Feto Virgem Maria Ramelau, Na’in Feto peregrina Fatubessi, Oekusi no mós iha Ataúru.
“Jubeliu iha peregrinasaun ne’e katak halo reflesaun, reflete ba laloran sira-ne’ebé ita liu iha ita-nia instituisaun família hodi la’o ba Porta Santa Sagrada, Kristu mak odamatan no ita-hotu liuhosi odamatan hodi hetan peniténsia”, Amu Angelo Salsinha, hatete iha Balide, kinta ne’e.
Amu hatutan, oráriu ba peregrinasaun hahú kedas iha Janeiru to’o fali Dezembru tinan ne’e. Inisiativa bele maihosi instituisaun família, grupu ida-idak bele halo, depois hanesan matéria orasaun, ne’e Dioseze ida-idak sei prepara hodi halo peregrinasaun.
“Orasaun Jubeliu ne’ebé Vatikanu públika ona no ita-nia CET halo tetun ne’ebé ita hotu sei akompañia módulu ne’ebé iha no aproveita tempu hodi bele manan grasa Jubeliu nian. Ita-nia sakrifísiu ne’ebé Ita la’o ba, ita-nia fiar kredo ne’ebé ita konfesa liliu rekonsiliasaun hadame malu entre ita ho ita, ita ho ema, ita ho natureza, ema ho Maromak no skramentu eukaristia mós sei halo iha ne’ebá”, Pe. Angelo dehan.
Prezidente ATR-TL hatete, maibé nia konteudu mak oinsá manan esperansa.”Ita-nia esperansa, kbiit, forsa la’o iha laloran ne’e mak Kristu. Jesús ida Jubeliu ne’e maihusi tradisaun biblia nian. Tinan ne’ebé fó ona perdaun, ema ne’ebé tusan barak. Entaun tradisaun ne’e sai ona uma kreda ninian ne’ebé igreja komesa adota ida-ne’e. Tinan jubeliu ne’e halo umanidade, halo reflesaun, perdaun, rekonsiliasaun, no tempu ne’ebé ita bele simu Maromak nia domin, grasa”, Prezidente ATR-TL tenik.
Nia dehan tan tinan Jubeliu halo peregrinasaun iha esperansa. Esperansa ne’e la bosok, lema esperansa Jubeliu nian mak “umanidade”, ne’ebé iha perigrinasaun ho kontinente haat mak ema la’o hasoru laloran, laloran ne’e iha difikuldade mak problema polítika, sosiál, ekonomia.
“Ita hotu-hotu la’o hasoru laloran, problema sosiál atuál mak ondas ne’e maibé ita hotu la’o hasoru Kristu inkarma, terus, mate, no moris hias, ita hotu-hotu la’o hodi haku’ak Kristu. Kristu mak sai ita-nia ankor, ne’ebé abut metin iha ne’ebá, esperansa hodi hakuak hamutuk, umanidade tomak tanba Kristu mai terus, mate ho ita no to’o moris iha hias, ida-ne’e la bosok”, katak nia.
Entaun esperansa ida-ne’e mak Amu Papa deklara iha tinan ne’e, peregrinasaun esperansa Kristaun Katólika hotu-hotu iha mundu tomak atu kompriende ida-ne’e atu hamutuk ho Kristu”, nia dehan.
Padre dehan tan peregrinasaun ne’e la’o tiha ona iha Roma, Vatikanu, hahú kedas iha 25 Dezembru 2024, ne’ebé Papa deklara sai ba públiku no agora hahú ona peregrinasaun. Iha ne’ebá ne’e Jubeliu ba komunikasaun, sei halo Jubeliu ba peregrinu sira, Jubeliu ba jornalista sira ne’ebé komunikasaun hahú daudaun ona, sei Jubeliu ba juventude, Jubeliu ba família, Jubeliu ba ema ho defisiénsia, no ba polítika sira no Jubeliu ba imigrante.
Mudansa tinan jubileu neʼebé akontese iha testamentu tuan nian ne’e hatudu kada tinan 50 ne’e hanesan manán grasa ida, hanesan ema sira-ne’ebé deve nasaun ne’ebé tusan barak durante tinan 50 ne’e liberta ona husi ninia tusan no nia moris foun fila-fali, ida-ne’e oinsá ema bele liberta malu, kore husi nia fukun sira tradisaun biblia nian.
Maibé, nia haktuir, depois muda fali iha Amu Papa João Paulo II nian, tinan Jubileu iha tinan 2000 la’ós selebra iha kada tinan 50 maibé selebra fali ba tinan 25 de’it, ema Kristaun halo peregrinasaun manán induljénsia, perdaun, rekonsiliasaun, domin no pás, ida-ne’e mak tenke halo fila-fali, hanesan momentu grasa ida ema halo peregrinasaun ba fatin-fatin, neʼebé uma kreda lokál determina ona.
Núnsiu Apostóliku Vatikanu iha Timor-Leste, Monsenhor Marco Sprizzi, hatutan Jubeliu mak Igreja organiza kada tinan 25. Jubileu hanesan loron moris Jesus Kristu nian ida-idak halo peregrinasaun. Igreja Katólika organiza Jubileu boot simu grasa ispirituál sira no Jubileu ida ne’e atu espresa imi nia problema, no peregrinu sira nia Esperansa nian. Timor ne’e Nasaun joven ne’ebe harii aumenta ba bebeik ne’ebé ho nia potensia boot
Notísia relevante: ATR-TL prepara pakote ba peregrinasaun tinan jubileu 2025 iha TL
Jornalista : Osória Marques
Editora : Rita Almeida
