DILI, 13 Fevereiru 2025 (TATOLI)–Prezidente Komisaun D ne’ebé trata asuntu Ekonomia no Dezenvolvimentu iha Parlamentu Nasionál (PN), Ricardo Baptista, nota lei rai no fornesimentu eletrisidade sai preokupasaun ba investidór sira husi estranjeiru atu mai investe iha Timor-Leste.
Deputadu Bankada Governu husi Congresso Nacional para a Reconstrução de Timor-Leste (CNRT) hateten, Timor-Leste iha ona lei investimentu no sosiedade komersiál ne’ebé fó dalan nakloke no oportunidade ba investidór sira husi rai-li’ur, inklui fó protesaun no asegura mai investe iha Timor.
“Sira mós barak, sira mai la liuhusi TradeInvest, entaun sira la aproveita lei investimentu ne’ebé iha, ida-ne’e mós horisehik ami halo diskusaun ho TradeInvest no semana hirak liubá ho SERVE, I.P. Ein jerál ladun iha problema liga ho investimentu husi rai-liur. Problema ne’ebé ita hasoru mak horisehik ami ko’alia ho TradeInvest kona-ba problema lei ba rai, ne’e tenke haree oinsá, estatutu rai tenke klaru, rai Estadu mak ida-ne’ebé no rai privadu mak ida-ne’ebé, atu nune’e ema investidór ida mai se nia ko’alia ho propriedade ne’e ema privadu ruma, tenke ko’alia ho modelu saida de’it no se rai ne’e Estadu ko’alia ho Estadu oinsá mak halo investimentu ho Estadu,” Prezidente Komisaun A informa ba Agência Tatoli, iha resintu PN, kinta ne’e.
Nia dehan, problema daruak mak ita-nia fornesimentu eletrisidade kontinua ho kustu boot, nune’e Komisaun iha semana hirak liubá hasoru empreza produsaun bee hanesan Fresca no Gota, ne’ebé sira-nia parte hato’o problema hanesan, fornesimentu enerjia eletrisidade mate lakan.
“Nune’e sira sempre ladún seguru ba sira-nia prosesamentu ne’ebé hala’o. Sira mós hato’o fornesimentu enerjia eletrisidade karun, sira halo komparasaun Timor ho Singapura ita karun liu, problema rua ne’e mak sira hasoru,” nia akresenta.
Notísia relevante : PR Horta: Governu presiza aselera aprovasaun lei protesaun investimentu iha TL
Deputadu Ricardo Baptista katak, seguransa rai-laran hakmatek hela nune’e garante atu investidór sira mai halo investimentu.
“Maibé Governu mak iha kompeténsia bele haree liután kona-ba lei investimentu ne’e, bainhira iha lakuna ruma bele aprezenta proposta alterasaun mai Parlamentu Nasionál,” nia hato’o.
Komisaun A ne’ebé trata asuntu Justisa no Konstituisionál no Komisaun D dadaun ne’e trata hela proposta-lei Garantia Mobiliáriu, proposta-lei Kódiku Rekuperasaun Insolviénsia no lei propriedade Industriál.
Tuir Deputadu Ricardo, bainhira lei sira ne’e aprova ona mak sei proteje liután setór privadu nasionál no investidór estranjeiru.
Jornalista : Nelson de Sousa
Editora : Julia Chatarina
