VIKEKE, 13 Fevereiru 2025 (TATOLI)—Ekipa téknika husi empreza responsável projetu hahú implementa projetu eletrifikasaun iha suku Uma Ki’ik, postu Vikeke Vila, munisípiu Vikeke.
Koordenadór Eletricidade de Timor Leste, Empreza Públika (EDTL, E.P), Ernesto Sarmento, informa, projetu ne’e ba populasaun ne’ebé durante ne’e la asesu ba eletrisidade.
“Ita entrega ona projetu eletrifikasaun iha suku Uma Ki’ik ba empreza, ne’ebé foin lalais ne’e ita lansa ona hodi hahú serbisu dada eletrifikasaun,” Koordenadór hato’o ba Agência Tatoli, iha Vikeke Vila, kinta ne’e.
Notísia relevante : Projetu eletrifikasaun komunitária abandonadu, Komunidade Lebadae no Loco-Loco ladauk asesu eletrisidade
Kontratu ho empreza ba implementasaun projetu ho durasaun fulan-tolu, maibé depende ba empreza sira-nia serbisu.
“Ami sei halo inspesaun no monitoriza, nune’e bainhira buat ruma ladi’ak maka ami sei fó hatene ba empreza hodi hadi’a,” nia hato’o.
Iha fatin ketak, Xefe suku Uma Ki’ik, Claudino Amaral, agradese tanba projetu ne’e konsege implementa ona tanba durante ne’e populasaun sira la asesu ba liña eletrisidade.
“Ami agradese tanba ami-nia komunidade tinan barak la asesu ba eletrisidade, agora mak foin tama projetu dada ahi ba aldeia haat. Projetu ida-ne’e ami lansa ona, empreza mós estabelese ona sira-nia sede iha suku Uma Ki’ik. Nune’e mós, ami sei akompaña prosesu serbisu ne’e to’o ramata,” nia katak.
Uma-kain 193 husi aldeia haat hanesan Raihun, Macadean, Maroman no Ainauain iha suku Uma Ki’ik mak sei benefisia ba projetu ne’e.
Projetu referida ho númeru kontratu 004/wk/EDTL,E.P 2025, ho kustu $247.903,60, ne’ebé responsabiliza husi empreza Uca-Aba unip, LDA.
Jornalista : Vitorino Lopes da Costa
Editor : Cancio Ximenes
