DILI, 14 Fevereiru 2025 (TATOLI)—Bankada Partidu Demokrátiku (PD) iha Parlamentu Nasionál (PN) koordena ho parte internál partidu ba substituisaun Deputadu António da Conceição ‘Kalohan’.
Iha loron 12 Fevereiru, Prezidente Repúblika, José Ramos Horta, fó pose ba António da Conceição ‘Kalohan’ hodi asume kargu nu’udár Embaixadór Timor-Leste iha Suisa no Embaixadór ba Nasaun Unida.
“Kona-ba subtituisaun husi Bankada Partidu Demokrátik, ami halo ona koordenasaun ho partidu depois orsida lorokraik ami sei hasoru malu ho Prezidente Partidu no Sekretáriu Jerál ne’ebé mak asume hela responsabilidade atu sai mós hanesan Embaxadór,” Xefe Bankada PD iha PN, Manuel Noronha, fó sai iha resintu PN, sesta ne’e.
Notísia relevante : Xefe Estadu fó posse ba Kalohan sai Embaixadór TL iha Suisa-Nasaun Unida
Nia dehan, atu nomeia subtituisaun ne’e desizaun husi partidu no bainhira rekomenda mai bankada prontu simu hafoin hato’o ba meza Prezidente Parlamentu Nasionál.
“Ne’desizaun husi partidu mak atu nomeia bazeia ba lista kandidatu ne’ebé atu subtitui Kalohan,” nia akresenta.
Daudaun ne’e Deputadu husi Bankada PD ninia fatin iha PN la mamuk tanba Deputadu Kalohan seidauk fó rezutadu loloos nune’e tempu badak sei iha substituisaun.
“Parese segunda Kalohan sei mai atu komprementa Prezidente Parlamentu hanesan ema ne’ebé mak iha responsabilidade durante iha Parlamentu Nasionál,” nia tenik.
Xefe Bankada konsidera, Xefe Estadu nia desizaun fó pose ba Kalohan molok ne’e liu prosesu lubun ida, maski emposadu iha prosesu iha Tribunál.
“Jurista mós kestiona no NGO sira mós ko’alia asuntu ida-ne’e, mais Prezidente Repúblika la’ós ema beik, Prezidente Repúblika kuandu foti desizaun ida ba ema ida atu reprezenta Timor iha nasaun seluk, nia sei estuda antes foti desizaun. Prezidente haree Kalohan kona problema ida, problema ne’ebé Kalohan hasoru iha Tribunál ne’e problema ida la’ós Kalohan mak halo, hanesan ministru responsável ida ezekuta programa Governu, maibé bainhira lei deteta buat ruma, nafatin Partidu Demokrátiku nia lideransa prontu nafatin atu hatán,” nia katak.
Jornalista : Nelson de Sousa
Editora : Julia Chatarina
