DILI, 14 Fevereiru 2025 (TATOLI)–Eletricidade de Timor-Leste, Empreza Públika (EDTL, E.P) rekolla ona reseita millaun $58-resin ba kofre Estadu, durante tinan 2024.
“Ita laiha balansu entre despeza no reseita, loos duni situasaun mak ida-ne’e. Fonte enerjia ne’ebé ita uza daudaun rekere ba kustu ka despeza boot tanba utiliza gazoel no disel ba operasaun jeradór iha Hera no Betanu hodi bele fornese enerjia ba nasaun,” Prezidente Komisaun Ezekutiva EDTL, E.P, Paulo da Silva, informa ba jornalista sira hafoin ramata enkontru ho bankada Governu husi Congresso Nacional da Reconstrução Timorense (CNRT) no Partidu Demokrátiku (PD), sesta ne’e, iha Parlamentu Nasionál (PN), sesta ne’e.
Notísia relevante : Tinan 2023, EDTL, E.P fó prioridade hadi’a kualidade fornesimentu enerjia elétrika
Nia dehan, kustu ba gazoel ou disel ne’e rasik karun, enkuantu situasaun daudaun iha Timor-Leste nia merkadu ki’ikoan, ho populasaun millaun 1,3.
“Uza enerjia pur volta 55% to’o 60% husi enerjia ne’ebé prodús iha sentrál sira, agora restu ita soe,” nia akresenta.
Aliende ne’e, Timor-Leste laiha indústria, nune’e oinsá mak uza enerjia ne’ebé prodús hodi bele hatama reseita ba Estadu.
“Entaun, úniku planu ne’ebé ita iha mak ho dalan diversifika fonte enerjia, tanba ne’e planu ba oin, hahú iha fulan-marsu bele asina kontratu ho konsórsiu empreza manán-na’in hodi bele harii planta solar paraíba iha Laleia, Manatutu, mínimu megawatt 72 hodi bele ajuda poupansa despeza ba mina,” nia akresenta.
EDTL, E,P iha tinan ne’e halo estudu viabilidade hamutuk ho IFC kona-ba enerjia anin iha Oele-Bobonaro no Larigutu-Ossu, ne’ebé kada fatin uor volta megawatt 50, nune’e bainhira téknikamente viável komersialmente, maka bele esplora no dezenvolve atu kompleta ho solar paraíba.
“Ida-ne’e sei ajuda ita redús kustu ba gazoel, se karik ita redús ona kustu, ita-nia reseita ne’ebé hetan millaun $60 to’o $70 bele kobre despeza diária no ida-ne’e kobre ona la presiza subsídiu husi Governu,” nia esplika.
Jornalista : Nelson de Sousa
Editora : Julia Chatarina
