Empreza Bobometo ladauk konstrui Ponte Oébaha
OEKUSI, 14 Fevereiru 2025 (TATOLI) – Diretór Diresaun Rejionál Infraestrutura (DRI), Rejiaun Administrativa Espesiál Oekusi Ambeno (RAEOA), Remigio Nuno Sila, relata to’o agora kompañia Bobometo Undip, Lda seidauk konstrui ponte Oébaha tanba tarde iha prosesu mobilizasaun materiál sira ne’ebé sei prodús iha Jakarta-Indonézia.
Tuir kontratu loloos kompañia hahú kontrui ponte ne’e iha loron 03 Dezembru 2024 no tenke finaliza iha loron 03 Maiu 2025.
“Maibé konstrusaun ponte Oébaha ne’e seidauk konstrui tanba foin lalais ita-nia enjeñeiru ida husi obra públika hamutuk ho site manajér kompañia nian, sira bá verifika haree ona materiál sira iha Jakarta, tanba materiál hotu sei order husi Jakarta, ne’ebé sira lori nia dezeñu ba atu prodús materiál sira mak foin dezloka mai, entaun sei han tempu ne’ebé tarde liu fulan ida ka rua hanesan ne’e mak foin konstrusaun ne’e la’o,” nia dehan iha Oekusi, ohin.
Nia informa, maske konstrusaun ponte seidauk hahú maibé husi kompañia mobiliza ona materiál sira hanesan gabiaun to’o ona tereñu atu konstrui uluk morru protesaun.
“Materiál sira-ne’e ita halo ona teste aprovasaun liuhusi ekipa tékniku sira, no mós ekipamentu pezadu sira kontinua hala’o serbisu kee rai, tanba pedidu husi kompañia katak atu konstrui uluk morru protesaun mak foin halo ponte ne’e,” nia dehan.
Notísia relevante:Komunidade Oébaha husu Rogério Lobato kumpre promesa harii ponte iha Paut
Entretantu, ponte Oébaha lokaliza iha bairru Paut aldeia Oébaha suku Bobometo sub-rejiaun Oésilo, nu’udar dalan alternativa atu liga bá sub-rejiaun Pássabe inklui Nítibe.
Kontrusaun ponte Oébaha sei ezekuta husi kompañia lokál Bobometo Unip, Lda ho valór kontratu $841,871.06, Autoridade RAEOA aloka husi Orsamentu Jerál Estadu (OJE) 2025. nian ho durasaun servisu hahú iha loron 03 Dezembru 2024 no tenke finaliza iha loron 03 Maiu 2025.
Notísia relevante:Rogério Lobato orienta DRI prepara BoQ hodi konstrui ponte iha Oébaha
Jornalista: Abílio Elo Nini
Editór: Florencio Miranda Ximenes
