DILI, 14 Fevereiru 2025 (TATOLI)–Sekretariu Estadu Igualdade (SEI), sesta ne’e, introdús kompromisiu polítiku liga ho jéneru ba Ministériu Ensinu Superiór Siénsia no Kultura (MESSK) hodi implementa.
Sekretária husi SEI, Elvina de Sousa Carvalho, hatete programa advokasi ne’ebé la’o durante ne’e importante.
“Ha’u apresia exelénsia Ministériu Ensinu Superiór, tanba bele promove jéneru, ohin ita ko’alia ona katak SEI ho MESSK halo lansamentu ba polítika jero toleránsia iha Institutu Superiór Filosofia no Teolojia (ISFIT). Husi ida-ne’e bele asegura estudante bele asesu edukasaun ho seguru”, Elvina hatete iha Kolmera.
Nia rekomenda ba MESSK prevee orsamentu ba implementasaun tinan-oin.
Ministru MESSK, José Honorio, dehan ministériu kompromete apoiu planu husi SEI. “SEI husu atu ita implementa, tanba ne’e ita tenke tau orsamentu Planu Anuál para implementa”.
SEI mós ko’alia kona-ba prevensaun asediu seksual, dalabarak akontese iha ensinu superiór tanba ne’e governu iha responsabilidade atu oferese informasaun.
“Governu iha responsabildade hodi fó formasaun ba ita-nia profesór sira. Nune’e MESSK kontinua servisu hamutuk ho SEI hodi implementa no SEI mós ko’alia kona-ba feto nia partisipasaun iha desizaun. Iha ha’u-nia ministériu kargu xefia ba feto sira iha 49% (23) no mane iha 51% (24).
Notísia relevante: SEI aprezenta implementasaun polítika igualdade jéneru no Konvensaun CEDAW ba KM
Jornalista : Osória Marques
Editora : Rita Almeida
