DILI, 25 setembru 2024 (TATOLI)—Sekretária Estadu ba Igualdade (SEI), Elvina de Sousa Carvalho, halo aprezentasaun iha reuniaun Konsellu Ministru (KM) ordinária, kona-ba implementasaun polítika igualdade jéneru no rekomendasaun sira husi Konvensaun kona-ba eliminasaun husi forma hotu diskriminasaun kontra feto (CEDAW).
“SEI aprezenta faze datoluk husi deklarasaun Maubisse (2023-2028), ne’ebé fó kontinuasaun ba faze interiór sira, ne’ebé foka liu ba empoderamentu ekonómiku feto rurál sira no ema ho defisiénsia. Faze ida-ne’e aliña ho prioridade IX Governu Konstitusionál no rekomendasaun husi Konvensaun sobre eliminasaun husi forma hotu diskriminasaun kontra feto,” referidu nota ne’ebé Agência Tatoli asesu hafoin reuniaun ezekutivu, kuarta ne’e.
Notísia relevante : SEI kontinua reforsa sistema jestaun violénsia bazeia ba jéneru liuhusi semináriu
Kompromisu prinsipál husi faze ida-ne’e fahe ba área tolu hanesan área kapitál sosiál, ne’ebé abranje protesaun sosiál, edukasaun inkluziva no kuidadu saúde, ho foka ba prevensaun violénsia bazeia ba jéneru no melloria kuidadu saúde materna, área infraestrutura, ne’ebé promove asesu ba merkadu seguru no asesível, dezenvolvimentu estrada, saneamentu no edifísiu públiku adaptadu, ho énfaze ba transporte públiku inkluzivu no ikus liu área ekonómia, ne’ebé fó prioridade ba dezenvolvimentu agríkola, empreendedorizmu feto no asesu kréditu ba feto rurál sira hodi reforsa sira-nia partisipasaun iha setór hanesan turizmu no agrikultura.
Nune’e mós, reforsa ba mekanizmu monitorizasaun hodi garante implementasaun husi kompromisu sira-ne’e.
Ezekusaun ne’e lidera husi instituisaun governamentál xave oiN-oin, inklui ministériu relevante sira no Banku Nasionál Komérsiu Timor-Leste (BNCTL, sigla portugés) ne’ebé asegura konkretizasaun efikás ba medida sira ne’ebé prevee ona.
Antes ne’e SEI hala’o enkontru ho grupu traballu iha kada interministeriál ho intermunisipál sira, atu identifika opurtunidade no dezafiu sira iha implementasaun planu no programa IX Governu hodi promove igualdade jéneru.
“Ida-ne’e ita halo dahuluk iha ha’u-nia mandatu ho grupu interministeriál no intermunisipál sira, tanba sira iha papél importante hodi asegura polítika, programa no planu ne’ebé mak sensível ba jéneru. Ita bele dehan, iha implementasaun programa Governu nian iha munisípiu no ministériu sira atu asegura implementasaun programa no orsamentu sensível ba jéneru ho nia finalidade atu asegura igualdade jéneru, konta mós ho kontribuisuan hosi grupu traballu interministériál no intermunisipál,” Sekretária Estadu Elvina de Sousa, tenik.
Jornalista : Osória Marques
Editora : Julia Chatarina
