BAUKAU, 14 Fevereiru 2025 (TATOLI)—Serbisu Munisipál Saúde (SMS) Baukau kontinua sosializa ba komunidade atu prevene aan husi moras dengue.
Diretór Serbisu Munisipál Saúde Baukau, Cristiano Cipriano Belo, esplika munisípiu Baukau konsideradu nu’udár área risku ba moras hada’et hanesan dengue nune’e inísiu tinan ne’e kontinua halo prevensaun liuhusi meiu promosaun no sosializa ba komunidade nune’e bele prevene aan husi moras dengue.
“Atividade sosializasaun ita kontinua realiza no iha rezultadu di’ak tanba redús kazu dengue iha Baukau,” Diretór Serbisu Munisipál Saúde Baukau informa ba TATOLI iha ninia kna’ar fatin, Vila Antiga, Baucau, sesta ne’e.
Notísia relevante: SMS rejista kazu dengue 14 iha Baukau
Cristiano Belo haktuir métodu prevensaun sira ne’ebé hala’o mak hanesan fó edukasun promosaun ba família, fahe mensajen liuhusi Igreja, musola, eskola no autoridade lokál ne’ebé apoia husi serbisu voluntáriu no profesór sira.
Aleinde ne’e, atividade programa integradu saúde liuhosi pesoál saúde distribui mós abate ba komunidade hanesan uza ba vazu ai-funan, tanke bee no balde ne’ebé importante atu kombate larva no halo fumigasaun ba área risku sira ne’ebé rejistradu iha kazu dengue ho distánsia metru 100.
“Fatór kazu dengue akontese dalaruma maihusi atitude ita ema tanba lakohi hamoos ambiente liuliu iha uma,” Cristiano Belo akresenta.
Nia sublinña, mezmuke prevene ona liuhosi métodu fumigasaun maibé presiza iha asaun seluk hanesan limpeza ambiente, hamoos uma-laran hanesan hikar roupa, fase tanke bee semana ida dala rua sei efetivu no prevene husi moras dengue iha komunidade.
Serbisu Munisipál Saúde Baukau inísiu tinan ne’e rejista kazu dengue hamutuk 14 kompostu mane sanulu no feto haat ho kategória rua hanesan moderadu na’in ida no krítiku na’in 13 ne’ebé maihusi postu administrativu tolu hanesan Baukau Vila, Venilale no Vemasse.
Jornalista: Natalino Belo
Editór: Xisto Freitas da Piedade
