DILI, 14 Fevereiru 2025 (TATOLI)—Tribunál Judisiál Primeira Instánsia (TJPID) halo re-julgamentu ba kazu antigu Ministru Komérsiu Indústria no Ambiente (MCIA-sigla portugés), Constâncio Pinto no arguidu AC ba krime partisipasaun ekonomia iha negósiu ne’ebé previstu iha artigu 274 inklui arguidu DX ne’ebé envolve krime administrasaun danoza ne’ebé previstu iha artigu 297 Kódigu Penál Timor-Leste.
Iha audiénsia julgamentu ne’e, juíz koletivu hahú rona uluk arguidu AC nia depoimentu no iha prosesu referidu, juíz koletivu hahú produsaun prova sira hodi konfirma filafali faktu sira ne’ebé molok ne’e Ministériu Públiku akuza ba arguidu AC.
Iha sala julgamentu, arguidu AC hato’o depoimentu bá Tribunál katak momentu nia mak asumi kargu hanesan Diretór Indústria iha Ministériu Komérsiu Indústria (MCIA) no momentu nia mak deside atu halo pagamentu 60% ba empreza Start Product ba projetu resiklajen iha Manleuna, tanba tuir relatóriu husi ekipa téknika MCIA nian ba projetu resiklajen ne’e katak nesesáriu duni para MCIA halo pagamentu ba empreza Start Product Unipessoal, Lda tanba empreza halo ona atividade tuir duni kontratu ne’ebé selebra ona ho MCIA.
Arguidu haktuir katak momentu nia submete pedidu bá Diresaun Adminstrasaun Finansa MCIA atu halo pagamentu ba empreza referida no iha loron hanesan nia mós simu duni karta ida maihusi Asesór Jurídiku Ministériu Finansa. Iha karta ne’e deskreve katak husu bá Diretór Indústria MCIA atu halo kanselamentu ba pagamentu osan subvensaun públika ne’ebé MCIA atu atribui bá empreza Start Product.
Tuir Asesór Jurídiku Ministériu Finansa nia pareser katak osan subvensaun ne’e só atribui ba atividade sira naun lukrutiva, la’ós ba empreza ne’ebé lukrutiva sira.
Notísia relevante: Defeza Constâncio Pinto sei hatama rekursu hodi kontesta desizaun Tribunál
Arguidu afirma katak momentu nia simu duni karta husi Asesór jurídiku Ministériu Finansa no hafoin simu tiha karta ne’e, arguidu asina hodi konfirima katak nia simu karta pareser husi Asesór jurídiku Ministériu Finansa.
“Kazu ne’e kle’ur ona, tan ne’e ha’u la lembra. Maibé, bainhira ha’u konfirma fali bá livru boot iha ha’u-nia gabinete, iha-ne’ebá ne’e ha’u-nia asinatura duni,” António deklara iha sala julgamentu TJPID, Kaikoli, sesta ne’e.
Arguidu deklara katak maski Asesór Jurídiku Ministériu Finansa halo pareser bá MCIA atu halo kanselamentu ba pagamentu 60% ba empreza Start Product, maibé Diresaun Indústria MCIA nafatin halo pagamentu bá empreza referida tanba bazeia ba relatóriu ekipa téknika MCIA ne’ebé halo levantamentu no inspesaun bá atividade empreza ne’e nia fatin katak empreza ne’e halo duni servisu resiklajen tuir kontratu ne’ebé ho MCIA.
Tanba nesesáriu duni, ne’e duni hanesan diretór indústria halo pedidu ba Diresaun Administrasaun Finansa MCIA atu halo pagamentu 60% bá empreza Start Product Unipessoal.
“Momentu ne’e ha’u la informa bá ministru relevante tanba tuir prosesu administrativu, karta pedidu pagamentu ne’e ha’u só submete bá Diresaun Administrasaun Finansa,” nia konklui.
Hafoin rona tiha parte hotu, Tribunál marka fali julgamentu ba loron 21 Fevereiru 2025 tuku 14:00 Otl, hodi kontinua rona arguidu Constâncio Pinto no diretór empreza Start Product Unipessoal, Lda.
Rekorda fali katak, molok ne’e, iha 14 Fevereiru 2024, Tribunál Judisiál Primeira Instánsia Dili aplika pena prizaun efetivu tinan neen ba Antigu Ministru Komérsiu Indústria, Constâncio Pinto, no aplika pena prizaun tinan lima ba arguidu AC no pena prizaun tinan haat ba arguidu DX ba osan subvensaun públika iha MCIA, iha 2016 ba finansiamentu projetu Indústria transformasaun reziklajen ne’ebé halo husi empreza Start Product iha Manleuna.
Razaun Tribunál aplika pena prizaun ba arguidu hirak-ne’e tanba faktu sira ne’ebé aprezenta durante iha audiénsia julgamentu katak arguidu na’in rua envolve duni iha krime partisipasaun ekonomia iha negósiu, enkuantu arguidu DX nu’udár na’in ba empreza Tribunál aplika pena prizaun tinan haat tanba provadu katak arguidu envolve duni krime administrasaun danoza ne’ebé Ministériu Públiku imputa iha arguidu.
Tribunál nia desizaun antes ne’e mós husu ba arguidu DX nu’udár na’in ba empreza atu devolve filafali Estadu nia osan ne’ebé empreza uza ona ho montante $24.000.
Jornalista: Natalino Costa
Editór: Xisto Freitas da Piedade
